भक्तपुर, ८ माघ बाग्मती प्रदेश खेलकुद बिकास परिषद्ले आफ्ना १३ वटै जिल्लाका जिल्ला खेलकुद बिकास समितिमा नेतृत्व चयन गरेको छ । परिषद्को निर्णय अनुसार जिल्ला खेलकुद बिकास समिति भक्तपुरको अध्यक्षमा श्रीभक्त काशीछवा नियुक्त भएका छन् ।
मंगलवार बसेको परिषद् बैठकले भक्तपुर अध्यक्षमा श्रीभक्त काशीछवालाई नियुक्त गरेको सदस्य सचिव सूर्य भण्डारीले पुष्टि गरे । खेलाडी पृष्ठभूमीका काशीछवा सफल युवा व्यवसायी समेत हुन् । सूर्यविनायकस्थित योयो बैंक्वेट लगायतका उनी संचालक रहेका छन् । उनी नेपाल कम्युनिष्ट पार्टी (नेकपा) संग आवद्ध छन् ।
सदस्य सचिव सूर्य भण्डारीले जनाए अनुसार काठमाडौमा अरुण बस्नेत र ललितपुरमा भरत प्रसाद पराजुली अध्यक्ष नियुक्त भएका छन् भने काभ्रेमा मानबिर लामा र चितवनबाट प्रह्लाद प्रधान परेका छन् । त्यसैगरी सिन्धुलीमा खडग रजन मगर, मकवानपुरमा सानु लामा,धादिङमा प्रताप सिङ तामाङ , रसुवामा दावा तामाङ , नुवाकोटमा बुद्धिमान तामाङ, रामेछापमा राजेश श्रेष्ठ , दोलखामा रोहित खड्का र सिन्धुपाल्चोकमा शिव देउजा अध्यक्ष नियुक्त भएका छन् । परिषद बैठकले समितिमा सदस्यहरु समेत नियुक्त गरेको भण्डारीको भनाइ छ ।