भक्तपुर, १९ साउन गएराति करिब २ बजे सिन्धुपाल्चोकको मेलम्ची बजारमा पहिरो गएको छ । पहिरोमा पुरिएर ८ जना वेपत्ता भएका छन् भने एकजनालाई प्रहरीले उद्धार गर्न सफल भएकाे छ ।
मेलम्ची नगरपालिकाका मेयर डम्बर बहादुर अर्यालले आठ जना मजदुर पहिरोमा पुरिएका र उनीहरुलाई अझै निकाल्न नसकिएकाे बताए। नेपाली सेना, प्रहरी र स्थानीय उद्धारमा खटिएका छन् । वेपत्ता भएकाहरु कभर्ड हल निर्माणमा खटिएका कामदारहरु रहेको बुझिएको छ ।निर्माणाधीन कवर्डहल नजिकै जस्ताको टहरामा दुईजना भारतीय र ७ जना वीरगञ्जका बासिन्दा रहेको खुलेको डिएसपी माधवप्रसाद काफ्लेले बताए । घाइते अवस्थामा उद्धार गरिएका व्यक्ति ३५ वर्षका भारतीय नागरिक बारु साह हुन् र उनको प्राथमिक स्वास्थ्य केन्द्र मेलम्चीमा उपचार भइरहेको प्रहरीकाे भनाइ छ । अरु ८ जनाको उद्धारको काम भइरहेको तर पानी परिरहेकाले समस्या भएको बताइएकाे छ ।
गत असार २४ गते राति सिन्धुपाल्चोकका भोटेकोसी, बुलकुटे र ठाडो खोलामा आएको बाढी पहिरोमा वेपत्ता भएका २० जना अझैसम्म फेला परेका छैनन् ।