भक्तपुरपोष्ट संवाददाता
भक्तपुर, ३० भदौ । भक्तपुरको सिद्धि स्मृति अस्पतालका स्वास्थ्यकर्मीहरूमा कोभिड–१९ को सङ्क्रमण पुष्टि भएको छ । यस कारण अस्पताल आइतबारदेखि बन्द गरिएको छ ।
अस्पतालका निर्देशक श्यामसुन्दर धौभडेलले बिहीबार ३९ जना स्वास्थ्यकर्मीको स्वाब सङ्कलन गरी परीक्षणको लागि पठाइएकोमा २१ जनाको पोजेटिभ परिणाम देखिएको जानकारी दिए ।
ती सङ्क्रमित स्वास्थ्यकर्मीलाई आइसोलेसनमा पठाइसकेपछि अस्पताल निष्सङ्क्रमण गरी चरणबद्ध अस्पताल सञ्चालन गरिने पनि उनले जानकारी दिए ।
भक्तपुरमा बालबालिकाको लागि आकस्मिक सेवा भएको अस्पताल अरु नभएकोले सकेसम्म चाँडो चरणबद्ध रुपमा अस्पताल सञ्चालन गरिने छ । सङ्क्रमित स्वास्थ्यकर्मीहरूमध्ये सुरुका दुई जना भक्तपुर खरिपाटीस्थित आइसोलेसन सेन्टरमा पठाइएको र अरु १८ जना जनालाई सोमबार पठाउने तयारी भइरहेको छ ।