भक्तपुर, ७ असोज । सरकारले अत्यावश्यक काम बाहेक जथाभावी यात्रा नगर्न आह्वान गरेको छ । साथै यात्रा गर्दा सकेसम्म घरबाटै खाजा लगेर जान पनि अनुरोध गरेको छ ।

यातायात व्यवस्था विभागले अपिल जारी गर्दै भनेको छ, ‘यात्राको क्रममा जथाभावी खाना–खाजा खाँदा, सवारीसाधनमा चढ्दा–झर्दा, अनावश्यक यात्रा गर्दा कोभिडको संक्रमण झन् फैलनसक्ने जोखिम रहने हुँदा यात्रुले यात्राको क्रममा आफूलाई आवश्यक पर्ने खाना–खाजा सकेसम्म घरबाट नै प्याकिङ गरी साथमा लिएर हिँड्न अनुरोध छ ।’

यसैगरी, विभागले होटल, रेस्टुरेन्टलाई स्वच्छ खाना, खाजा प्याकिङ गरी उपलब्ध गराउन पनि निर्देशन दिएको छ । सरकारी निर्णय अनुसार असोज १ गतेदेखि सार्वजनिक यातायात सञ्चालनमा आएको थियो ।