काठमाडौं, ७ असोज । बुधबार कीर्तिमानी आरोही आङरिता शेर्पाका राष्ट्रिय सम्मानका साथ अन्त्येष्टि गरिएको छ । उनको अन्त्येष्टि काठमाडौंको टेकु दोभानमा बौद्ध परम्पराअनुसार गरिएको हो ।
पर्यटन, संस्कृति तथा नागरिक उड्डयनमन्त्री योगेश भट्टराईले शेर्पाको पार्थिव शरीरमा राष्ट्रिय झण्डा ओढाएर सम्मान व्यक्त गरेका थिए । साथै सशस्त्र प्रहरीको एक टुकडीले शेर्पाप्रति सलामी अर्पण गरेको थियो ।
आङरिता २००५ सालमा सोलुखुम्बुको हिलाजुङ (हाल पासाङल्हामु गाउँपालिका– थामे) मा जन्मिएका थिए । ‘हिउँचितुवा’ का नामले विश्वभर कहलिएका उनले नेपालका ८ हजार अग्ला सबै हिमाल बोतलको अक्सिजनबिना आरोहण गरेर कीर्तिमान बनाएका थिए । उनले वसन्तकालीन र शरदकालीन दुई याममै बोतलको अक्सिजनबिना सगरमाथा आरोहण गरेका थिए । उनको यो कीर्तिमानलाई कसैले पनि तोड्न सकेको छैन । आङरिताले अन्तिमपटक सन् १९९६ मा सगरमाथा आरोहण गरेका थिए ।
