भक्तपुर, ४ माघ २०७८भक्तपुर युनाइटेड फुटबल क्लब जिल्ला लिग फुटबल-२०७८ को च्याम्पियन बनेको छ । भक्तपुर जिल्ला फुटबल संघद्वारा आयोजित प्रतियोगितामा भक्तपुर युनाइटेड लिग च्याम्पियन बनेको हो । सानोठिमीस्थित खेल मैदानमा मंगलवार सम्पन्न फाइनल खेलमा लोकन्थली एफसीलाई २–१ गोल अन्तरले पछि पार्दै भक्तपुर युनाइटेड लिग च्याम्पियन बन्न सफल भएको थियो ।
भक्तपुर युनाईटेडका लागि मनोज लामा र कृष्ण गुरागाईले खेल शुरु भएको क्रमशः सातौ र नवौ मिनेटमा १-१ गोल गरेका थिए ।
उपाधी विजेता भक्तपुर युनाईटेडले नगद ५० हजारसहित ट्रफी पाएको छ भने उपविजेता लोकन्थलीले नगद २५ हजारसहित ट्रफी पाएको आयोजकले जनाएको छ ।
प्रतियोगितामा लोकन्थलीका रोहित गिरी सर्वोत्कृष्ट खेलाडी घोषित भए । उनले प्रतियोगिताको अन्तिम समयमा गरेको प्रहार गोलमा परिणत गर्न सफल भएपनि लोकन्थली दोश्रो स्थानमा रहन पुग्यो । प्रतियोगितामा उत्कृष्ट गोलकिपर लोकन्थलीकै रिजेन हेका हुनपुगे भने सर्वाधिक ६ गोल गरेका लोकन्थलीकै आशिष थिङ उत्कृष्ट स्कोरर हुन सफल भए । त्यसैगरी थिमि युथ क्लबका समिर श्रेष्ठ उत्कृष्ट रक्षक, भक्तपुर युनाईटेडका हरिश कार्की उत्कृष्ट फरवार्ड र विश्व विनायकका रविन कुटु उत्कृष्ट मिल्डफिल्डर घोषित भए । उत्कृष्ट सबै खेलाडीले जनही रु ५ हजार नगद पुरस्कार प्राप्त गरेका छन् ।
प्रतियोगिताका विजयी खेलाडी तथा क्लव त्यसैगरी प्रतियोगिताभरीमा उत्कृष्ट घोषित खेलाडीहरुलाई अखिल नेपाल फुटबल संघका अध्यक्ष कर्मा छिरिङ शेर्पा, उपाध्यक्ष उपेन्द्रमान सिंह, एन्फाको जिल्ला समन्वय समितिका सहसंयोजक एवम् मध्यपुर युथ एशोसियसनका उपाध्यक्ष अष्टकुमार कवे, भक्तपुर जिल्ला फुटबल संघका अध्यक्ष किशोर हेका, वरिष्ठ उपाध्यक्ष अनिल हेका, नेपाल पत्रकार महासंघ भक्तपुरका अध्यक्ष जगत प्रजापति, प्याव्सन भक्तपुरका अध्यक्ष सुरेन्द्र तुबँजा श्रेष्ठ लगायतले पुरस्कार प्रदान गरेका थिए । उक्त अवसरमा फुटबल खेलप्रेमीहरुको उल्लेखनीय उपस्थिति रहेको थियो ।