नेपाली काँग्रेसका महासचिव गगनकुमार थापाले स्थानीय तहमा काँग्रेसबाट निर्वाचित जनप्रतिनिधिहरुको परीक्षा लिइने खुलासा गरेका छन् । उनले वार्षिक रुपमा पार्टीबाट निर्वाचित प्रमुख/ उपप्रमुखहरुको परीक्षा लिइने खुलासा गरेका हुन् ।

बुधवार भक्तपुरमा आयोजित काँग्रेसबाट निर्वाचित जनप्रतिनिधिहरुलाई बधाई तथा सम्मान व्यक्त गर्ने कार्यक्रमलाई सम्बोधन गर्दै महासचिव थापाले आफ्नो पार्टीबाट निर्वाचित मेयर/उपमेयर र वडाका जनप्रतिनिधिहरु जनताप्रति जवाफदेयी हुनुपर्ने र पार्टीको घोषणा पत्रको अधिनमा रही कार्यसम्पादन गर्नुपर्ने आवश्यकता औल्याए ।

महासचिव थापाले नगरमा निर्वाचित जनप्रतिनिधिको पार्टी केन्द्रले आवधिक परीक्षा लिने योजना बनाइरहेको खुलासा गर्दै त्यसमा खरो उत्रन र पास हुन प्रोत्साहित गरेका थिए । निर्वाचित जनप्रतिनिधिले राम्रो काम नगर्दा जनतामा पार्टीप्रतिको बिश्वास घट्ने र आगामी दिनमा पार्टीले हार्न सक्ने हुँदा पार्टीले कामको अनुगमन र मूल्यांकनको नीति लिएको उनले स्पष्ट पारे । “जिल्लाका नेतासंग बुझी टोपल्ने किसिमको मूल्यांकन बिधि होइन, केन्द्रले तोकेको सूचकको आधारमा केन्द्रीय संयन्त्रबाट मूल्यांकन हुन्छ । ” उनले भने ।

उनले सेवा मेलाको आयोजना गरी जनताको घरदैलोमा नगरपालिकाको सेवा पुर्याउन सुझाव दिंदै नगरपालिकामा कार्ययोजना बनाएर आफ्नो कार्य गर्न निर्देशन समेत दिए । भक्तपुरमा काँग्रेसले नेतृत्व गरेको नगरपालिका देशकै नमूना बन्नुपर्ने र देशका अन्य नगरपालिकाले यहाँबाट सिक्नसक्ने गरी काम गर्नुपर्ने उनले प्रष्ट पारे ।

भक्तपुरमा नेपाली कांग्रेसले जिल्लाका ४ नगरपालिका मध्ये २ नगरपालिकामा प्रमुख पद हात पारेको छ । मध्यपुर थिमिमा निवर्तमान नगर सभापति सुरेन्द्र श्रेष्ठ र चाँगुनारायणमा क्षेत्रीय सभापति जीवन खत्री मेयरमा निर्वाचित भएका छन् । कार्यक्रममा श्रेष्ठ र खत्रीले जनताको शासक नभई सेवक भएर काम गर्ने प्रतिवद्धता प्रकट गरेका थिए । मध्यपुरमा नेकपा (माओवादी केन्द्र) संग गठबन्धन गरेको काँग्रेसले उपमेयरमा माओवादीका केन्द्रका विजय कृष्ण श्रेष्ठ पाएको छ भने चाँगुमा आफ्नो उपमेयर उम्मेदवारले पराजय भोगेपछि एमालेका नगर अध्यक्ष रहेका रमेश बुढाथोकीलाई उपमेयर स्वीकार्न बाध्य बनेको छ ।

कार्यक्रममा नेपाली काँग्रेस भक्तपुरका सभापति दुर्लभ थापाले स्थानीय निर्वाचनमा अन्तर्घात गर्ने पार्टीका नेता कार्यकर्तालाई आममाफी नहुने उद्घोष गरेका छन् । काँग्रेसकै केही नेता कार्यकर्ताका कारण जित्नुपर्ने ठाउँमा हार्नुपरेको जिकिर गर्दै उनले उक्त उद्घोष गरेका हुन् । काँग्रेसले नेकपा(एकीकृत समाजबादी)संगको गठबन्धनका बाबजूद सूर्यविनायक नगरमा नेकपा एमालेसंग पराजय व्यहोर्नु परेको छ भने भक्तपुर नगरपालिकामा नेमकिपाको अगाडी जमानत समेत जोगाउन सकेको छैन । यद्यपी, यी दुवै नगरमा समेत काँग्रेस प्रमुख प्रतिस्पर्धी रहेको थियो ।

यो पनि

दिनभरी काँग्रेस र रातभरी एमाले हुने अन्तर्घातीलाई माफी हुँदैन : दुर्लभ थापा