भक्तपुर, ३१ असार २०७९ भक्तपुरमा भोली शनिबार साइकल कनेक्ट भक्तपुरको आयोजनामा कोरा भक्तपुर साइकलिङ च्यालेन्ज हुने भएको छ । भक्तपुरको रफत सञ्चार क्लबमा आयोजित पत्रकार सम्मेलनमा भोलि बिहान ६ बजे बाट कार्यक्रम सुरु हुने कोरा भक्तपुरका क्यापटेन सुनिल ख्याजुले जानकारी दिए ।
ख्याजुका अनुसार भक्तपुरबाट ५०,७५ र १०० कि.मी को तीनवटा रुट निर्धारण गरिएको छ । हालसम्म ५० कि.मी रुटको लागि १२० पुरुष र ८ महिलाले आवेदन दिएका छन् । ७५ कि.मी रुटको लागि ४५ पुरुष र २ महिला, १०० कि.मी रुटको लागि १०४ पुरुष र ३ महिलाले आवेदन दिएको ख्याजुले जानकारी दिए ।
कोरा भक्तपुरले विगत एक वर्षदेखि हरेक हप्ता साइकल सम्बन्धी कार्यक्रम सञ्चालन गर्दै आएको अध्यक्ष सुनिल बालाले बताए । साइकलिङ शारीरिक रुपमा मात्र नभई मानसिक स्वास्थ्यको लागि पनि उत्तिकै लाभदायी भएकाले साइकलिङको विकास र प्रर्वधनमा जोड दिन उनले आग्रह गरेका छन् । अहिले नेपालमा रहेका विभिन्न साइकल क्लबहरु मध्ये सबैभन्दा सक्रिय समुहको रुपमा कोरा भक्तपुर रहेको पनि उनले दाबी गरे ।
भोलि बिहान ६ बजे बाट भक्तपुर दरबार स्क्वायरमा भेला भएर साइकल यात्रा सुरु हुने छ । सफलतापुर्वक च्यालेन्ज सकाउने सहभागीहरुलाई मेडलले सम्मान गरिनेछ ।