भक्तपुर, २६ कार्तिक २०७९भक्तपुर निर्वाचन क्षेत्र नम्बर २ मा प्रतिनिधि सभा सदस्यका लागि २ दर्जन बढी उम्मेदवार रहेपनि २ जना उम्मेदवारबीच घम्साघम्सी रहेको देखिन्छ । गठबन्धनका तर्फबाट उम्मेदवार रहेका काँग्रेस सभापति दुर्लभ थापा र एमालेका तर्फबाट उम्मेदवार रहेका निवर्तमान सांसद महेश बस्नेतबीच घम्साघम्सी देखिएको हो ।
शनिवार बिहान आफ्नो गाउँ कटुन्जेमा सम्पन्न चुनावी सभा बाट उत्साहित गठबन्धनका उम्मेदवार दुर्लभ थापालाई उनकै गाउँमा साँझ पुगी बस्नेतले चुनौती दिएका छन् । यस अघि बस्नेतको गाउँ गुन्डूमा एमालेको घरदैलोकै दिन गठबन्धनले पनि घरदैलो कार्यक्रम राखेको थियो ।
स्थानीय निर्वाचनको मतपरिणामले कुनै चमत्कार नभए गठबन्धनका थापा र एमालेका बस्नेत बीच नै प्रतिस्पर्धा रहेको पुष्टि गर्दछ । त्यसैले एक अर्काको मत खोस्न पनि मतदातालाई आकर्षित गर्नुको बिकल्प यी दुई उम्मेदवारसंग छैन । अघिल्लो निर्वाचनमा माओवादी केन्द्र र काँग्रेसको असन्तुष्ट समूहको समेत साथ् पाएका एमाले उम्मेदवार बस्नेतलाई अहिले आफ्नै पार्टीको समेत पुरै मत प्राप्त हुने अवस्था छैन । एमालेबाट फुटेर एकीकृत समाजवादी बनेका मतदाताहरुको मत गठबन्धका उम्मेदवार दुर्लभ थापातर्फ गएको छ । तर, पूर्व मन्त्री र सांसदको रुपमा महेश बस्नेतले मतदातासंग बनाएका सम्बन्ध उनले पूंजीका रुपमा थपेका छन् । गठबन्धनका उम्मेदवार दुर्लभ थापाको लागि यो विषय पक्कै पनि टाउको दुखाइको विषय हो ।
काँग्रेस जिल्ला सभापति समेत रहेका उम्मेदवार थापाले शनिवार आफ्नो गाउँ कटुन्जेमा आयोजित चुनावी सभालाई सम्बोधन गर्दै पूर्व मन्त्री र सांसदको रुपमा महेश बस्नेत जनताको सेवामा भन्दा बढी व्यक्तिगत सम्पत्ती आर्जनमा लागेका बताएका छन् । बस्नेतले बिकासको बहाना बनाउदै सार्वजनिक बन मास्ने, सार्वजनिक डाडो काट्ने लगायत काम गरेर प्राकृतिक सम्पती दोहन गरी व्यक्तिगत सम्पती आर्जन गरेको थापाले आरोप लगाएका छन् । अख्तियारले छानवीन गर्ने हो भने बस्नेतको जीवन जेलमा बित्ने उनले जिकिर पनि गरे ।
साँझ कटुन्जे पुगेर काँग्रेस उम्मेदवारले सम्बोधन गरेको सभास्थल चक्रपाणी चोकमा आयोजित सभालाई एमाले उम्मेदवार बस्नेतले सम्बोधन गर्दै कांग्रेसको नेतृत्वमा १५ वर्ष भक्तपुरको जिम्मेवारी हुँदा ५ वटा कामहरु पनि नभएको दावी गरे । ”अहिले १८ महिनाको सरकारको पालामा पनि भक्तपुरमा कति रकम ल्याउनुभयो ? तपाईको सरकारबाट जनताले के पाए ? ” उनले प्रश्न गरे ।आफूले बिकासको नेतृत्व गरेको जिकिर गर्दै उनले अर्बौंको बजेट ल्याई भक्तपुरमा बिकासको बाढी ल्याएको बताए । बालकोटमा केपी बा र गुन्डूमा महेश दा हुन्जेल बिकासका लागि भक्तपुरबासीले कुनै चिन्ता लिनु नपर्ने उनको भनाइ छ ।
काँग्रेस उम्मेदवार थापाले भने एमाले उम्मेदवार बस्नेतले भ्रमको खेती गरिरहेका बताएका छन् । बस्नेतका कारण भक्तपुरकै बद्नाम भैरहेको भन्दै बस्नेतले बिकासका कुरा जनतालाई अल्मल्याउन गरिरहेका थापाले आरोप लगाए । कटुन्जेमा आयोजित सभामा शनिवार उनले मतदातासमक्ष अनुरोध गर्दै भने, ” हामी लोकतन्त्रमा बिस्वास गर्छौं । महेश बस्नेतलाई प्रश्न गर्नुहोस, उनले सहि जवाफ दिए भने उनैलाई भोट दिनुहोला तर, गफकै भरमा भ्रममा रहेर कदापी भोट नखसाल्नुस ।” आफ्नो गाउँ कटुन्जेमा थापाले आफ्नो बिगत कोट्याउदै र संविधान सभा सदस्य स्वर्गीय रामेश्वर ढुंगेललाई स्मरण गर्दै गरेको सम्बोधनले स्थानीय भावविह्वल भएका थिए ।