भक्तपुर, २६ कार्तिक २०७९भक्तपुर क्षेत्र नं.२ मा प्रतिनिधिसभा सदस्य उम्मेदवार रहेकी नेमकिपाकी केन्द्रीय सदस्य अनुराधा थापा मगरले नेकपा (एमाले) असली कम्युनिष्ट पार्टी नभएको बताएकी छन् । एमाले कम्युनिष्टको मुकुण्डो लगाएको पार्टी भएको उनको भनाइ छ ।
मध्यपुर थिमीमा आयोजित एक चुनावी सभालाई सम्बोधन गर्दै उनले एमालेले जनतालाई भ्रममा राखेर सत्तामा पुगेको आरोप लगाइन । एमालेको सरकार हुँदा कम्युनिष्ट सिद्धान्तअनुसार काम नगरेको बरु आफ्नो कार्यकर्तालाई फाइदा हुने काम मात्र गरेको उनले जिकिर गरिन ।
कम्युनिष्ट सिद्धान्त अनुसार शिक्षा, स्वास्थ्य पूर्ण निःशुल्क हुनुपर्नेमा एमालेको सरकारले निजीलाई प्रोत्साहन गरेको उल्लेख गर्दै उनले नेमकिपाले जितेको भक्तपुर नगरपालिकाबाट सिक्न सुझाव दिईन । देश र जनताको पक्षमा निस्वार्थ सेवा गर्नसक्ने नेमकिपा मात्र भएको भन्दै उनले नेमकिपाका उम्मेदवार बिजयी भएमात्र देश राम्रो बन्ने बताइन ।
एमाले आफैमा नक्कली कम्युनिष्ट भएकाले यसका उम्मेदवार महेश बस्नेत पनि नक्कली विकासवादी भएका उनको भनाइ छ । उम्मेदवार महेश बस्नेतप्रति इंकित गर्दै उनले प्रश्न गरिन, ”ख्वप मावि र कलेजका विद्यार्थीहरूको प्रमाणपत्र नक्कली हुन् भन्ने शासक दलका नेता कतै शैक्षिक दलाल त होइनन ?”
सभामा प्रदेशसभाका उम्मेदवार रमेश वैद्य, केन्द्रीय सदस्य उकेश कवां लगायतले मन्तब्य राखेका थिए ।