भक्तपुर, १ मङ्सिर २०७९भक्तपुर क्षेत्र नं. २ को प्रतिनिधि सभा र प्रदेश सभा निर्वाचनमा हार्ने निश्चित भएपछि नेकपा एमाले तल्लो स्तरको चरित्र प्रदर्शन गर्दै गाली गलौज र आरोपमा उत्रिएको नेपाली कांग्रेस भक्तपुरले जनाएको छ । मौन अवधि शुरु हुनु अघि एमाले उम्मेदवार महेश बस्नेतको मुखपत्रको रुपमा रहेको एक अनलाइन मार्फत एमाले गाली गलौज जस्तो तल्लो स्तरको राजनीतिमा उत्रिएको नेपाली कांग्रेसले एक विज्ञप्ती जारी गर्दै जनाएको हो ।
भक्तपुरमा तेब्बर मतान्तरले जित्ने दावी गर्दै आएका बस्नेत चुनाव हार्ने निश्चित भएपछि कांग्रेस र उसका उम्मेदवारको चरित्र हत्यामा उत्रेको कांग्रेसको ठहर छ । बुधवार अबेर एमाले निकट एक अनलाइनले ” भक्तपुर कांग्रेसको बाहिरियो ‘काण्डैकाण्ड’ शिर्षकमा समाचार छापेपछि कांग्रेसले यसलाई हारको मानसिकता भएको बताएको छ ।
कांग्रेसले आरोपको तथ्यसहित खारेज समेत गरेको छ । मौन अवधीको फाइदा उठाउदै विपक्षी उम्मेदवारको चरित्र हत्या गर्ने उद्देश्यले प्रायोजित रुपमा अनेक लाञ्छना लगाउने कार्यमा एमाले र उम्मेदवार महेश बस्नेत लागि परेको बताउँदैं त्यस्ता तल्लो स्तरको गैरराजनीतिक क्रियाकलापमा उत्रेका दल र तीनका उम्मेदवारलाई मंसिर ४ गते आफ्नो अमूल्य मत मार्फत गतिलो जवाफ दिन कांग्रेसले आम मतदातालाई आग्रह गरेको छ ।