भक्तपुर, ३ मङ्सिर २०७९भक्तपुर क्षेत्र नम्बर २ का मतदाता रहेका निर्वाचन आयोगका प्रमुख निर्वाचन आयुक्त दिनेश थपलियाले युनिक नेपाल मतदान केन्द्रबाट मतदान गर्ने भएका छन् । मध्यपुर थिमि नगरपालिका वडा नम्बर १ लौहकिन्थलीस्थित युनिक नेपाल मतदान केन्द्रबाट उनले मतदान गर्ने भएका हुन् ।
आइतवार बिहान ७ बजे प्रमुख निर्वाचन आयुक्त थपलियाले पहिलो मतदान गरेर मतदान शुरु गर्ने निवाचन कार्यालय भक्तपुरका सूचना अधिकारी भिमबहादुर बिसीले बताए । उक्त अवसरमा पर्यवेक्षणका लागि नेपाल आएका मित्रराष्ट्रहरुका निर्वाचन प्रमुखहरुको पनि उपस्थिति रहने बिसीले बताएका छन् ।
देशभर प्रतिनिधि सभाका २ सय ७५ र प्रदेश सभाका ५ सय ५० सदस्य चयनका लागि १ करोड ७९ लाख ८८ हजार ५ सय ७० मतदाताले मतदानका लागि नाम दर्ता गराएका छन् । भक्तपुरमा २ प्रतिनिधि सभा सदस्य र ४ प्रदेश सभा सदस्य चयनका लागि कूल १ लाख ९४ हजार ४ सय ३९ जना मतदाता रहेका छन् ।
मतदानका लागि जिल्लामा २ सय २२ वटा मतदान केन्द्र तोकिएका छन् । निर्वाचन क्षेत्र नम्बर १ मा २८ मतदान स्थलमा १ सय १५ मतदान केन्द्र र क्षेत्र नम्बर २ का ३८ मतदान केन्द्रमा १ सय ५ गरी जम्मा २ सय २० मतदान केन्द्र तोकिएका हुन् । कर्मचारीहरुको लागि भक्तपुरमा एउटा छुट्टै अस्थायी मतदान केन्द्र निर्धारण गरिएको छ जहाँ समानुपातिकतर्फको मात्रै मतदान हुने बताइएको छ । यसको मतदाता संख्या ८ सय ३५ रहेको छ ।
निर्वाचन गराउन जिल्लामा खटिएका १ हजार ७ सय ७६ कर्मचारी आवश्यक सबै सामग्री लिएर आआफ्नो मतदान केन्द्रमा तयारी अवस्थामा रहेका प्रमुख निर्वाचन अधिकृत गोपालप्रसाद बास्तोलाले बताए । उनीहरुले आइतबार विहान ७ बजेदेखि बेलुकी ५ बजेसम्म हुने मतदानका लागि लाइन लाग्ने, मतपत्र लिने, मत संकेत गरेर मतपेटिकामा खसाल्नका लागि सहज हुने गरी सबै तयारी पूरा गरिसकेका छन् ।
४ वटा मतपत्र छुट्टा छुट्टै मतपेटिकामा खसाल्नुपर्ने व्यवस्थाले मतपत्र दिंदा र खसाल्दा गडबडी नहोस भन्ने उदेश्यले कर्मचारीलाई विशेष सतर्कताको लागि निर्देशन दिइएको उनले बताए । सोही बमोजिम केन्द्रमा कर्मचारीले बुथ व्यवस्थापन गरेका बताइएको छ ।
भक्तपुरमा १० मतदान केन्द्रलाई अपांगतामैत्री बनाइएको छ भने मेधा मावि मतदान केन्द्रलाई पूर्ण अपाङ्गतामैत्री पारिएको छ । त्यसैगरी बोडे माविमा सबै कर्मचारी महिला राखिएको निर्वाचन अधिकृत लिलानाथ पराजुलीले जनाएका छन् ।
निर्वाचनलाई भक्तपुरमा भयरहीत वातावरणमा निर्वाचन सम्पन्न गर्न २ हजार २ सय १८ सुरक्षाकर्मी तैनाथ गरिएका छन् । ८ सय ८६ जना म्यादी प्रहरीसहित जिल्लामा २ हजार २ सय १८ जना सुरक्षाकर्मी परिचालन गरिएको प्रमुख जिल्ला अधिकारी रुद्रादेवी शर्माले जनाएकी हुन् । उनले निर्धक्क भएर उत्साहपूर्वक मताधिकार प्रयोग गर्न अपिल पनि गरेकी छन् ।