भक्तपुर-२ को प्रतिनिधि सभा तर्फ नेकपा (एमाले) उम्मेदवार रहेका पूर्व मन्त्री महेश बस्नेतलाई पछि पार्दै गठबन्धन तर्फका साझा उम्मेदवार कांग्रेस जिल्ला सभापति दुर्लभ थापा जीत नजिक पुगेका छन् । करिब ९३ प्रतिसत मतगणना भइसक्दा उनले ६ सय ८८ मतको अग्रता कायम राख्दै जीत नजिक पुगेका हुन् ।                                                                                     अघिल्लो निर्वाचनमा कांग्रेसका उम्मेदवार रहेका पूर्व सभामुख दमननाथ ढुङ्गानालाई दोब्बर मतले पराजित गर्दै प्रतिनिधि सभा सदस्य बन्न सफल एमाले उम्मेदवार बस्नेत यस पटक भने एक पटक पनि अघि बढ्न सकेका छैनन् । १४ औं पटक मतपरिणाम सार्वजनिक हुँदा बस्नेतले एकपटक पनि थापालाई उछिन्न सकेनन् । तर तीन अङ्कको झिनो मतान्तर कायम राख्दै उनले हरेक पटक कांग्रेसलाई चुनौती भने दिइरहेका छन् ।                                                                                           पछिल्लो मतपरिणाम साझ ७:३० अनुसार थापाले २२ हजार ६ सय ९४ मत पाउदा बस्नेतले २२ हजार ६ मत पाएका निर्वाचन अधिकृतको कार्यालयका कम्प्युटर अपरेटर न्हुज किजुले भक्तपुर पोस्टलाई जानकारी गराएका छन् ।                                     अब ४ हजार ७ सय ९४ मत मात्र गन्न बाकी रहेको बताइएको छ ।  गन्न बाकी मत मथ्यपुर थिमिका मतदान केन्द्रका मात्र भएका र स्थानीय निर्वाचनको नतिजा विश्लेषण गर्दा कांग्रेस उम्मेदवार दुर्लभ थापाले जीत हासिल गर्ने निश्चित प्रायः रहेको बिश्लेशकहरुले बताएका छन् । यस निर्वाचन क्षेत्रमा ६५ हजार ९ सय १९ मत खसेको थियो ।