निर्वाचन क्षेत्र नम्बर २ का प्रतिनिधि सभा सदस्यका निकटत्तम प्रतिस्पर्धी रहेका नेकपा एमालेका उम्मेदवार महेश बस्नेतले बिजयी उम्मेदवार नेपाली कांग्रेसका जिल्ला सभापति दुर्लभ थापालाई बधाई दिएका छन् । बिहीवार दिउँसो सल्लाघारी स्थित थापा निवास पुगी बस्नेतले बधाई दिएका हुन् ।

उक्त अवसरमा नेता बस्नेतले थापाले भक्तपुरको नाम उचो बनाउन सफल रहने बिश्वास व्यक्त गर्दै सफल कार्यकालको शुभकामना समेत दिएका थिए । उनले आफ्नो र पार्टीको तर्फबाट सधै रचनात्मक सहयोग रहने समेत बताए । एमाले पोलिटब्युरो सदस्य समेत रहेका नेता बस्नेत निवर्तमान प्रतिनिधि सभा सदस्य एवं पूर्व मन्त्री हुन् ।

शुभकामना प्रदान गर्न आएका नेता बस्नेतलाई धन्यवाद ज्ञापन गर्दै नवनिर्वाचित थापाले आफू इमान्दार भएर भक्तपुरका साथै देशको सेवामा जुट्ने जानकारी गराए । आफू सबैको साझा प्रतिनिधि बन्नेमा जोड दिदै उनले राजनीतिक आस्थाको आधारमा कुनै भेदभाव नगर्ने र सबैलाई मिलाएर लाने प्रयास गर्ने प्रतिवद्धता पनि प्रकट गरेका थिए ।

उक्त अवसरमा एमालेका जिल्ला उपाध्यक्ष एवं सूर्यविनायक नगरपालिकाका प्रमुख बासुदेव थापा लगायतको उपस्थिति रहेको एमाले नेता दिनेश थापाले जानकारी दिए ।