भक्तपुर, ५ माघ २०७९ साउदी अरबका एक व्यापारीले लियोनल मेस्सी र क्रिस्टियानो रोनाल्डोको खेल हेर्ने टिकट खरिद गर्नका लागि ३५ करोड भन्दा धेरै मूल्य खर्च गरेका छन् । भिआइपी सुइटमा बसेर दुई सुपरस्टार भिडेको हेर्नका लागि साउदीका एक व्यापारीले महँगो मूल्यमा भिआइपी टिकट किनेका हुन् ।
ती साउदी धनाड्यले २.२ मिलियन पाउण्ड खर्च गरेको विभिन्न खेल मिडियाले जनाएका छन् । रोनाल्डो आफ्नो क्लब अल–नासर र राजधानी रियाद प्रतिद्वन्द्वी अल-हिलालका खेलाडीहरू मिलेर बनेको अल-स्टार इलेवनको कप्तानी गरेर मध्य पूर्वमा आफ्नो स्थानान्तरणको पुष्टि गरेपछि पहिलो खेल खेल्दैछन् ।
स्टार फरवार्डद्वय क्रिस्टियानो रोनाल्डो र लिओनेल मेस्सी बिहिबार हुने मैत्रीपूर्ण खेलमा आमनेसामने हुँदैछन् । फ्रान्सेली क्लब पेरिस सेन्ट जर्मेनले साउदी अल स्टार ११ को सामना गर्दा यी दुई २ वर्षपछि एक अर्कासँग भिड्न लागेका हुन् ।
पछिल्लो पटक मेस्सी र रोनाल्डोको भेट सन् २०२० डिसेम्बरमा भएको थियो । च्याम्पियन्स लिगमा बार्सिलोना र युभेन्ट्सबाट देख्दा दुई आमने सामने भएका थिए । त्यसपछि दुई आमने सामने हुन अवसर मिलेको छैन ।
यो रकम नेपालीमा ३५ करोड भन्दा बढी हुन आउँछ । सो टिकेटको लिलामी २ लाख २० हजार पाउण्डबाट सुरु भएको थियो । तर टिकटको लागि प्रतिष्पर्धा हुँदा ती व्यापारीले २ मिलियन पाउण्ड भन्दा बढीको बोलि लगाए । टिकट उच्च मूल्यमा किन्ने ती व्यापारी घर जग्गा व्यवसायी मुशर्रफ बिन अहमद अल घामदी रहेका छन् ।
यो इतिहासको सबैभन्दा महँगो फुटबल टिकट रहेको विभिन्न खेल मिडियाले जनाएका छन् । सो खेलबाट संकलित उक्त रकम साउदी अरेबियाको एहसान कोष नामक परोपकारी संस्थामा दान गरिनेछ ।