भक्तपुरमा जारी राष्ट्रब्यापी खुल्ला पुरुष भलिबल प्रतियोगिताकाे सेमिफाइनल समिकरण पुरा भएको छ ।सूर्यविनायक नगरपालिका-४ हर्सचौकमा आयोजित प्रतियोगितामा न्युटन एकेडेमी, ॐ श्रृजनसिल समाज, लिखु टिम र गणतान्त्रिक खेलकुद महासंघले सेमिफाइनलमा स्थान बनाएका हुन । आइतबार सम्पन्न क्वाटरफाइनलमा आयोजक ॐ श्रृजनसिल समाजले गान्धी आदर्श टिमलाई २५-१९ र २५-१६ काे साेझाे सेटमा पराजित गर्दै सेमिफाइनलमा स्थान पक्का गरेको हाे ।
त्यसैगरी न्युटन एकेडेमीले कागेश्वरी मनाेहरालाई २५-१६ र २५-१८ काे साेझाे सेटमा पराजित गरि सेमिफाइनलमा स्थान बनाएको छ । त्यस्तै गणतान्त्रिक खेलकुद महासंघ भक्तपुर जिल्ला खेलकुद बिकास समिति टिमलाई २५-१० र २५-२१ ले पराजित गर्दै सेमिफाइनलमा पुगेकाे छ ।
त्यसैगरी लिखु-८ ले लिखु सेवा समाजलाई २५-२३ र २६-२४ ले पछि पार्दै सेमिफाइनलमा पुगेको छ ।
प्रतियोगिता आयोजक समितिका संयोजक पेशल आचार्यका अनुसार शनिबारदेखि शुरू भएको प्रतियोगितामा ८ जिल्लाका १० टिमकाे सहभागिता रहेकाे छ । साेमवारसम्म चल्ने प्रतियोगिताको उद्घाटन सूर्यविनायक नगरपालिकाका नगर प्रमुख बासुदेव थापाले गरेका थिए ।
ॐ सृजनशील समाजले आयोजना गरेको प्रतियोगितामा प्रथम हुनेलाई ५० हजार, दोस्रो हुनेलाई २५ हजार, तेस्रो हुनेलाई १५ हजार र सान्त्वना हुनेलाई १० हजार पुरस्कारको बव्यवस्था गरिएको आयोजक संस्थाका अध्यक्ष अर्जुन केसीले बताए ।