मध्यपुर थिमि, २१ असोज २०८०छात्रवृत्ति दिन अटेर गरिरहेका नगर भित्र संचालित संस्थागत विद्यालयलाई कारवाही गर्ने मध्यपुर थिमि नगरपालिकाले चेतावनी दिएको छ । नियमानुसार छात्रवृत्तिका लागि पठाएका निर्णयहरु कार्यान्वयन गर्न ध्यानाकर्षण गराउँदैं कार्यान्वयन नगरे कारवाही गर्ने नगरपालिकाले चेतावनी दिएको हो ।
नगर शिक्षा समितिले निर्णय गरेका छात्रवृत्ति सम्बन्धी निर्णय कार्यान्वयन गर्न नगरपालिकाले निर्देशन गरेको थियो । केही विद्यालयले त्यसमा अटेर गरिरहेको जनगुनासो आएपछि सबै संस्थागत विद्यालयलाई पत्राचार गर्नुपरेको नगरपालिकाका शिक्षा शाखा प्रमुख ज्ञानेन्द्र भट्टले बताएका छन् ।
शिक्षा समितिको निर्णय नमान्ने विद्यालयलाई पत्र पठाई सचेत गरिएको र नियमानुसार गरिएको निर्णय नमान्ने छुट संचालकहरुलाई नभएको उपप्रमुख विजय कृष्ण श्रेष्ठले बताए । नगर शिक्षा समितिले निर्णय गरेको र कार्यान्वयनका लागि पत्राचार भएका विषयहरु लागू गर्नु विद्यालयको कर्तब्य भएको भन्दै नगर प्रमुख सुरेन्द्र श्रेष्ठले अटेर गर्नेलाई प्रचलित कानून बमोजिम कारवाही प्रक्रिया अगाडि बढाईने बताएका छन् ।
शिक्षा नियमावली २०५९ (संशोधन सहित) र नगर शिक्षा ऐन २०७९ मा रहेको प्रावधान अनुसार छात्रवृत्तिका लागि संस्थागत विद्यालयलाई नगरपालिकाले आग्रह गरेको हो ।
यो पनि
मध्यपुर थिमिका विद्यालयमा पहिलोपटक नगरपालिकाबाट छात्रवृत्ति वितरण (नामावलीसहित)
