नवौं अन्तर विद्यालय तेक्वान्दो (आइटिएफ) च्याम्पियनसीपमा सूर्यविनायक वडा ९ मा रहेको मदरल्याण्ड स्कूल टिम च्याम्पियन बन्न सफल भएको छ ।

प्रतियोगितामा मदरल्याण्ड स्कूल भक्तपुर ८ स्वर्ण, ४ रजत र ८ कास्य प्राप्त गर्दै टिम बिजेता बनेको हो । त्यसैगरी आरक्षण स्कूल भक्तपुरले ५ स्वर्ण, ८ रजत र ५ कास्यसहित दोस्रो तथा सुनाखरी पाठशाला काठमाडौंले ५ स्वर्ण, ३ रजत र ८ कास्यसहित तेस्रो स्थान हासिल गरेका छन् ।

उत्कृष्ट खेलाडी अब्राहम तोलाङ्गे (न्यु मोडेल एकेडेमी, काभ्रे) ले छात्र तर्फ र उत्कृष्ट खेलाडि रेजिना तामाङ (सुनाखरी पाठशाला, काठमाडौं)ले छात्रा तर्फ ब्यूटीफुल ट्रफी हात पारेका छन् ।

समापन समारोहका प्रमुख अतिथि नेपाल प्रहरीका पूर्व नायब महानिरीक्षक रमेश खरेल, राष्ट्रिय तेक्वान्दो संघका सचिव शनिस लागेजू तथा हंसदा योग आश्रमका अध्यक्ष स्वामी नीलकण्ठ र अध्यक्ष स्वामी पञ्चशीलले पदक तथा ट्रफी वितरण गरेका थिए ।

तेक्वान्दो आईटीएफ नेपाल र क्वालिटी इङ्लिस बोर्डिङ स्कुलको आयोजनामा अन्तरविद्यालय तेक्वान्दो आईटीएफ च्याम्पियनसिप सफलतापूर्वक सम्पन्न भएको आयोजकको भनाइ छ । यस इभेन्टका टुर्नामेन्ट डाइरेक्टर तथा तेक्वान्दो आईटीएफ नेपालका अध्यक्ष मास्टर लक्ष्मण बस्नेतले हरेक वर्ष गर्दै आएको च्याम्पियनसीप कोभिड-१९ को कारण २ वर्ष रोकिएको भए पनि पुनः निरन्तरता दिएको बताए ।

२१ व्यक्तिगत स्प्यारिङ र १२ व्यक्तिगत प्याट्रेन क्याटोगोरीको लागि एक दिनको कार्यक्रममा १३ विभिन्न विद्यालयहरूबाट २ सय ६ खेलाडी र अधिकारीहरू सहभागी थिए।