भक्तपुर, ३ पुस २०८०चाँगुनारायण प्याब्सनको आयोजनामा भएको नगरब्यापी विद्यालयस्तरीय फूटसल प्रतियोगितामा गोल्डेन सुनगाभाले जीत हासिल गरेको छ । फाइनलमा मित्रश्री स्कूललाई पराजित गर्दै गोल्डेन सुनगाभा बिजेता बनेको हो ।
प्रतियोगिताको तेस्रो स्थानमा प्रज्ञा स्कूल रहेको छ भने फुलब्राइट स्कूल चौथो स्थानमा आउँन सफल भएको छ । पहिलो, दोश्रो, तेस्रो र चौथो हुने टिम जिल्लास्तरीय प्रतियोगिताको लागि छनौट भएका प्याब्सन भक्तपुरका बरिष्ठ जिल्ला उपाध्यक्ष राजन कस्पालले जनाएका छन् । चाँगुनारायणमा ७ विद्यालयले फूटसलमा भाग लिएका थिए । प्रत्येक नगरबाट ४ टिम गरी सोह्र टिमबीच जिल्लास्तरीय प्रतियोगिता हुने बरिष्ठ उपाध्यक्ष कस्पालको भनाइ छ । जिल्लाबाट छानिएका टिम प्रदेशमा छनौट हुनेछन । बरिष्ठ उपाध्यक्ष कस्पालले विद्यार्थीमा फूटबलप्रतिको लगाव बढाउँन र खेलको विकास गर्न प्रतियोगिताले सहयोग पुग्ने बिश्वास व्यक्त गरेका छन् ।
बिजयी विद्यालय र खेलाडीहरुलाई पुरस्कृत गर्दै प्रमुख अतिथि रहेका चाँगुनारायण नगरपालिकाका प्रमुख जीवन खत्रीले विद्यालय र विद्यार्थीहरुले पढाई संगसंगै खेलकुदलाई पनि अघि बढाउनुपर्ने बताए । खेलले व्यक्तिको स्वास्थ्य राम्रो हुने र फूर्तिलो बनाउने उनको भनाइ छ । नगरपालिकाले खेलकुदलाई महत्वका साथ् बजेट बिनियोजन गरेको जानकारी गराउदै उनले खेलाडीहरुले नगरपालिकालाई देश बिदेशमा चिनाउन मद्दत गर्ने बताएका छन् ।
पुरस्कार वितरण समारोहमा वडा नम्बर २ का वडाध्यक्ष सोमप्रसाद प्रधान, प्याब्सनका पूर्व जिल्ला अध्यक्ष श्रीकृष्ण केसी लगायतको समेत आतिथ्यता रहेको थियो ।