भक्तपुर, १७ पुस २०८०भक्तपुरमा विद्यालय स्तरीय जिल्लाब्यापी राष्ट्रपति रनिङ् शिल्ड प्रतियोगिता पुस २७ गतेदेखि शुरु हुने भएको छ । ४ वटै नगरपालिकाले नगर स्तरीय राष्ट्रपति रनिङ् शिल्ड प्रतियोगिता सम्पन्न गरेसंगै पुस २७ गतेदेखि जिल्लास्तरीय प्रतियोगिता शुरु हुने भएको हो ।
मंगलबार जिल्ला समन्वय समिति भक्तपुरका प्रमुख ईश्वर बहादुर थापाको प्रमुख अतिथ्यतामा सम्पन्न बैठकले सो निर्णय गरेको जिल्ला खेलकुद बिकास समिति भक्तपुरका अध्यक्ष दीपक थापाले जनाएका हुन् । पुस २७ देखि २९ गते सम्म संचालन हुने उक्त प्रतियोगितामा नगरपालिकाहरुबाट बिजयी भएर आएका खेलाडी र खेल टोलीबीच प्रतिष्पर्धा हुने उनले बताएका छन् ।
प्रतियोगितामा भलिबल, एथलेटिक्स, तेक्वान्डो, उसु , कराते, कबड्डी लगायतका खेल हुने अध्यक्ष थापाले बताए ।
बैठकमा भक्तपुरकी प्रमुख जिल्ला अधिकारी रोशनी कुमारी श्रेष्ठ त्यसैगरी नगरपालिकाका शिक्षा शाखाका प्रमुख तथा प्रतिनिधिहरू, नेशनल प्याब्सन भक्तपुरका अध्यक्ष सञ्जय खड्का, प्याब्सनका सचिव विजय कर्मचार्य, भलिबल, एथलेटिक्स, तेक्वान्डो, उसु ,कराते, कबड्डी संघका अध्यक्षहरु लगायतको आतिथ्यता रहेको बताइएको छ ।