मध्यपुर थिमि, २४ फागुन २०८०साविक विजेता वडा नं. ९ ले अपराजित रहँदैं लगातार दोस्रो पटक मध्यपुर थिमि नगरपालिका वडा लिग फुटबल प्रतियोगिताको उपाधी जितेको छ । ७ औं चरणमा उपाधी पक्का गरिसकेको वडा नं. ९ ले बिहिवार सम्पन्न अन्तिम खेलका वडा नं. १ लाई २–१ ले हराउँदैं अपराजित यात्रा कायम राख्दै उपाधी जितेको हो ।
मध्यपुर थिमि नगरपालिकाको प्रायोजनमा मध्यपुर युथ एशोसियसनले सानो थिमिस्थित मैदानमा आयोजना गरेको खेलमा वडा नं. ९ को जितमा यमन राजबहाक र सुनिल चक्रधरले गोल गरे । वडा नं. १ का लागि सविन डंगोलले गोल गरे ।
यमनले खेलको २७ औं मिनेटमा प्राप्त कर्नरमा गोल गर्दै वडा नं. ९ लाई अग्रता दिलाए । यसअघि डि बक्स बाहिरबाट यमनको शक्तिशाली प्रहारलाई वडा नं. १ का गोलकिपर सरभ कुटुले उत्कृष्ट पञ्च गर्दै बचाएका थिए । सोही बलमा प्राप्त कर्नरमा यमनले पोष्टको दायाँतर्फबाट प्रहार गरेको कर्नर वडा नं. १ का गोलकिपरको हातमा लाग्दै सिधै गोलमा परिणत भएको थियो ।
खेलको ३० औं मिनेटमा वडा नं. ९ ले अग्रता दोब्बर पारे । वडा नं. ९ का लागि सुनिल चक्रधरले गोल गर्दै अग्रता दोब्बर बनाएको हो । यमनले पोष्टको दाँयातर्फबाट प्रहार गरेको कर्नरमा सुनिलले हेड गोल गरेका हुन ।
वडा नं. १ का लागि सविन डंगोलले सान्त्वना गोल गरे । वडा नं. १ का रोनक हेकाले डि बक्समा दिएको बल वडा नं. ९ का अमन राजबहाकले क्लियर गर्न नसकेको बलमा सविनले प्रहार गरेको बल गोल पोष्टमा लागेर गोलमा परिणत भएको थियो ।
विजेता वडा नं. ९ ले अपराजित रहँदैं लिगका ८ वटै खेल जितेर २४ अंकका साथ उपाधी जितेको हो । वडा नं. ९ ले उपाधीसँगै नगद २ लाख ५० हजार र ट्रफी हात पारेको छ ।
प्रतियोगितामा वडा नं. ५ उपविजेता बनेको छ । वडा नं. ५ ले ८ खेलमा ६ जित, १ बराबरी र १ हारका साथ १९ अंक बटुलेको छ । वडा नं.५ ले ट्रफीका साथ नगद १ लाख २५ हजार पुरस्कार प्राप्त गरेको छ ।
वडा नं. ३ ले १४ अंक प्राप्त गर्दै लिगमा तेस्रो स्थान हासिल गरेको छ । वडा नं. ३ ले ८ खेलमा ४ जित, २ बराबरी र २ हार व्यहोरेको थियो । वडा नं. ३ ले नगद ६० हजारका साथै ट्रफी हात पारेको छ ।
लिगको चौंथो स्थानमा १२ अंकका साथ वडा नं. ६, पाँचौं स्थानमा ११ अंकका साथ वडा नं. २, छैंटौं स्थानमा ८ अंकका साथ वडा नं. १, सातौं स्थानमा ६ अंकका साथ वडा नं. ८, आठौं स्थानमा ४ अंकका साथ वडा नं. ४ र अन्तिम स्थानमा ३ अंकका साथ वडा नं. ७ रहयो ।
प्रतियोगिताको सर्वोत्कृष्ट खेलाडी वडा नं. ९ का यमन राजबहाक घोषित भए । उनले नगद २५ हजार पुरस्कार प्राप्त गरे । लिगमा सर्वाधिक ८ गोल गरेका यमन प्रतियोगिताको उत्कृष्ट स्ट्राइकर समेत घोषित भए । सो वापत उनले थप १० हजार रुपैंया पुरस्कार पाए ।
प्रतियोगिताको उत्कृष्ट गोलरक्षक वडा नं ३ का अम्बर श्रेष्ठ,उत्कृष्ट रक्षक वडा नं ५ का सुदर्शन श्रेष्ठ,उत्कृष्ट मिड फिल्डर वडा नं ३ का विक्रम के.सी,उत्कृष्ट प्रशिक्षक वडा नं ९ का तुल्सी भुजु ‘राजा’ घोषित भए । उत्कृष्ट सबैले समान नगद १०÷१० हजार प्राप्त गरे । प्रतियोगिताको अनुशासित टोलीघोषित हुँदैं वडा नं ७नगद २५ हजार प्राप्त गरे ।
प्रतियोगिताका विजयी टोली र खेलाडीहरुलाई मध्यपुर थिमि नगरपालिकाका नगरप्रमुख सुरेन्द्र श्रेष्ठ, उपप्रमुख विजयकृष्ण श्रेष्ठ, पूर्व नगरप्रमुखहरु मदनकृष्ण श्रेष्ठ, मदनसुन्दर श्रेष्ठ, पूर्वउपप्रमुखहरु अञ्जनादेवी मधिकर्मी र मुरारीप्रसाद आचार्य, वडाअध्यक्षहरु, मध्यपुर युथ एशोसियसनका अध्यक्ष उपेन्द्रमान सिंह, उपाध्यक्ष अष्ट कवेलगायतका व्यक्तित्वहरुले पुरस्कृत गरे ।
सो अवसरमा मध्यपुर थिमि नगरपालिकाका प्रमुख सुरेन्द्र श्रेष्ठले प्रतियोगिता मध्यपुर थिमिमा राष्ट्रिय फुटबल खेलाडी उत्पादन गर्ने उद्देश्यले आयोजना गरिएको जानकारी गराए । उनले प्रतियोगिताका उत्कृष्ट खेलाडी छनोट गरी नगरपालिकाको टोलीको रुपमा निकट भविष्यमा नै अन्तरनगरपालिका कपमा सहभागी गराईने जानकारी समेत दिए ।
उपप्रमुख विजयकृष्ण श्रेष्ठले लिगका खेलहरु गतवर्षको तुलनामा स्तरिय भएको बताउँदैं आगामी वर्ष थप परिस्कृत गर्दै प्रतियोगिता सञ्चालन गर्ने जानकारी दिए । उनले नगरपालिकाले खेल क्षेत्रलाई पनि प्राथमिकतामा राखेर बजेट विनियोजन गरेको बताए ।
सो अवसरमा नगरपालिका र आयोजक एशोसियसन द्वारा संयुक्तरुपमा मध्यपुर थिमिका प्रत्येक वडाका तीन÷तीन जना भेट्रान फुटबल खेलाडीहरु, नेपाली महिला राष्ट्रिय फुटबल टोलीका पहिलो कप्तान रमा सिंह र महिला रेफ्री एवम् पूर्व खेलाडी विना श्रेष्ठलाई पनि दोसल्ला ओढाई सम्मान गरिएको थियो ।