भक्तपुर, १९ भदौ २०८१फ्रान्सको पेरिसमा सम्पन्न पारा ओलम्पिकमा काश्य पदक विजेता बनेकी तेक्वान्दो खेलाडी पलेशा गोवर्धन स्वदेश फर्किएकी छन् । पलेशाले पेरिस पारालम्पिक्समा तेक्वान्दोको के ४४ विधाअन्तर्गत महिला ५७ केजीमुनिको प्रतिस्पर्धामा सर्बियाकी खेलाडीलाई पराजित गर्दै काश्य पदक जितेकी थिइन् ।
पलेशालाई बुधबार बिहान त्रिभुवन अन्तर्राष्ट्रिय विमानस्थलमा भव्य स्वागत गरिएको छ । उनलाई पञ्चेबाजासहित स्वागत गरिएको थियो । पलेशाको स्वागतमा राष्ट्रिय खेलकुद परिषदका पदाधिकारीहरु विमानस्थल पुगेका थिए ।
विमानस्थलबाट पलेशालाई काठमाडौं महानगर परिक्रमा गराइएको थियो ।
राष्ट्रपति रामचन्द्र पौडेलले पलेशासहितको टोलीलाई सम्मान गरेका छन् । सम्मान कार्यक्रममा नेपाली सेनाको एक टुकडीले मंगलधुन बजाएर स्वागत गरेको थियो । कार्यक्रममा प्रथम महिला सविता पौडेल, युवा तथा खेलकुदमन्त्री तेजुलाल चौधरी, पदक विजेता पलेशाका बाबु आमा र खेल संघका पदाधिकारीहरुको सहभागिता रहेको थियो ।
पलेशालाई बुधवार नै प्रधानमन्त्री केपी शर्मा ओली, काठमाडौं महानगरका मेयर बालेन्द्र साह लगायतले पनि सम्मान गरेका छन् ।