भक्तपुर, २६ फागुन रामशेखर सहयोग समिति भक्तपुरद्वारा तलेजु बैंक्वेटमा आयोजित कार्यक्रममा साहित्यकार एवं कलाकार स्वर्गीय रामशेखर नकर्मीद्वारा लिखित “सिमात फःफःस्व” कथा संग्रहको बिमोचन गरिएको छ । नेपालभाषा एकेडेमीका चान्सलर चित्तरञ्जन नेपालीले पुस्तक विमोचन गरेका हुन् ।
कार्यक्रममा नेपालभाषा आन्दोलनका युवा नेता मल्ल के. सुन्दरले स्व राम शेखरको व्यक्तित्व व्यक्तिमात्र नभई संस्थाको रुपमा लिनु पर्ने बताए । उनको लेखन शैली तिखो भएको, तानाशाही पञ्चायती व्यवस्थाको विरुद्धमा सशक्त प्रतिनिधित्व दिएको र नेपालभाषा आन्दोलनमा ठूलो योगदान रहेका भन्दै रचनाहरु नाटक, हास्यव्यग्य, कथा, निवन्ध, उपन्यासहरु अहिले पनि उत्कृष्ट भएको बताए ।
समितिका संयोजक नरेन्द्रभक्त हाडाको सभापतित्वमा भएको उक्त कार्यक्रममा स्व. रामशेखरका आत्मीय साथी आशा थकुले उनको साहित्यिक एवं हास्यकलाकारको बारेमा जिवन्त प्रकाश पारेका थिए । कार्यक्रममा कथा अनुवादक गोविन्दमान श्रेष्ठ र ओमचरण अमात्यले उनको बारेमा प्रकाश पार्दै उनको योगदानलाई जिवन्तता दिनको लागि संस्थागत रुपमा अगाडि बढ्नु पर्नेमा जोड दिए ।
स्व रामशेखर दाईद्वारा लिखित पल्पसा साहित्य .ख्यःले प्रथम पटक प्रकाशित उक्त पुस्तकलाई महाजु फाउण्डेशन, नेवाः जनजागरणको आर्थिक सहयोगमा रामशेखर सहयोग समितिले दोश्रो संस्करण प्रकाशन गरिएको छ ।
“सिमात फःफःस्व” पुस्तक नेवाः भाषाबाट पहिलो प्रकाशनमा भएको थियो भने हाल सो पुस्तकलाई नेपाली भाषामा अनुवाद गरी दुवै भाषामा प्रकाशन गरेका थिए । अनुवाद गर्ने लेखकहरुमा त्रिरत्न शाक्य, गोविन्दमान श्रेष्ठ, ध्रुव मधिकर्मी, महेन्द्रगोपाल कर्माचार्य, ओमचरण अमात्य, अगिब बनेपाली, केवलप्रसाद कायस्थ र कृष्ण प्रजापति रहेका छन् ।
कार्यक्रम समितिका उपसंयोजक कृष्णभक्त बोडेले स्वागत गर्नुभएको थियो भने सचिव कृष्ण प्रजापति धन्यवाद दिनुभएको थियो । कार्यक्रम संचालन समितिका सदस्य महेन्द्रगोपाल कर्माचार्यले गरेको उक्त कार्यक्रममा भक्तपुर, काठमाडौं, ललितपुरलगायत अन्य क्षेत्रका कवि, साहित्यकार, संघसंस्थाका प्रतिनिधि एवं समाजसेवीहरुको उपस्थिति रहेको थियो ।
