भक्तपुर, १८ कात्तिकएजेन्सी । अस्ट्रियाको मध्य भियनाका ६ भिन्दाभिन्दै स्थानमा बन्दुकधारीले आक्रमण गरेका छन्। ठूलो संख्याका बन्दुकधारीले आक्रमण गर्दा १५ जना घाइते भएका छन्। घाइतेमध्ये ७ जनाको अवस्था चिन्ताजनक रहेको बताइएको छ । बीबीसीले दुईजनाकाे मृत्यु भएकाे बताएको छ ।
प्रहरीको जवाफी कारवाहीमा एक हमलाकारी मारिएको र अर्का एकलाई पक्राउ गरिएको प्रहरीले जनाएको छ। अर्का आक्रमणकारीको खोजी भइरहेको भनिएको छ ।
अस्ट्रियाका चान्सलर सेबेस्टियन कुर्जले यसलाई ‘आतंकवादी आक्रमण’ भनेका छन्। घटनापछि ठूलो संख्यामा सुरक्षाकर्मी परिचालन गरिएको छ ।
प्रहरीले आतंकवादीविरोधी कारबाही सुरु गर्दै घटना भएका क्षेत्रमा नहिँड्न र सार्वजनिक यातायात प्रयोग नगर्न भनेको छ। यस्तै, सहरमा ठाउँठाउँमा सडक अवरुद्ध गरिएको छ। छिमेकी चेक रिपब्लिकले पनि सीमामा छड्के चेक सुरु गरेको जनाएको छ ।
कोरोना भाइरसको संक्रमण रोक्न नयाँ प्रतिबन्ध लागू हुनु केही घण्टा अघि यो आक्रमण भएको हो। नयाँ नियमअनुसार बार र रेस्टुरेन्टहरु नोभेम्बरको अन्त्यसम्म बन्द रहनेछन् ।
यो आक्रमणको युरोपेली मुलुकका नेताहरुले भत्र्सना गरेका छन् । बेलायतका प्रधानमन्त्री बोरिस जोन्सनले घटनाबाट आफू स्तब्ध भएको जनाउँदै यसलाई आतंकवादी आक्रमण भनेका छन् ।