काठमाडौं, २३ असारपत्रकारको एवम् गजलकार आस्था केसीको ‘उज्यालोको खोजी’ तथा प्रदीप थापाको रुवाई, गीत, गजल संग्रह ‘प्रयास’का साथै एल्बम ‘प्रयास’को शनिवार सार्वजनिकरण गरिएको छ ।
शनिबार संवाद डबलीमा एक कार्यक्रमका बीच यी दुई कृतिहरुको सार्वजनिकरण गरिएको हो ।
अन्तर्राष्ट्रिय गजल मञ्च नेपालको आयोजनामा भएको सो कार्यक्रममा प्रमुख अतिथि गजलकार ललिजन रावलले गजल तथा साहित्यले समाज परिर्वतनमा अहम् भूमिका खेल्ने बताएका थिए ।
‘उज्यालोको खोजी’ गजलसंग्रहकी गजलकार अास्था केसीले आफ्नो गजलमा कल्पना भन्दा बढी बास्तविकता भएको बताइन् । आफू १५-१६ वर्षको किसोरी अवस्थामा जनयुद्धमा लागेको र त्यहि समयदेखिको भाव र भोगाइ गजलमा उर्लिएको उनले भनिन् ।
कर्यक्रममा ‘प्रयास’का लेखक प्रदीप थापाले पाठकहरुले माया प्रेम मन पराउने हुनाले आफु त्यसमा केन्द्रित भएर लेख्ने गरेको बताउदै यस विधामा निरन्तर लागिरहने प्रतिबद्धता प्रकट गरेका थिए ।
विमोचन भएको पुस्तक तथा एल्बम माथि गजलकारहरु प्रभाती किरण, ज्ञानु विद्रोही, सैलेन्द्र अधिकारी, डा. भोजराज घिमिरे तथा अन्तराष्ट्रिय गजल मञ्च नेपाल च्याप्टर संयोजक भरत पौडेल र नेपाली गजल मञ्च अध्यक्ष घनेन्द्र ओझाले समालोचना गरे ।
कार्यक्रममा नेपाल पत्रकार महासंघका पूर्व सचिव प्रभात चलाउने, प्रेस काउन्सिल नेपालकी सदस्य संगीता खड्का, वरिष्ठ पत्रकार नरेन्द्रजंग पिटर लगायतको उपस्थिति रहेको थियो ।