भक्तपुर, २२ साउन भारतको सत्तारुढ दल भारतीय जनता पार्टीकी वरिष्ठ नेत्री सुषमा स्वराजको निधन भएको छ । पूर्व विदेश मन्त्री समेत रहेकी स्वराजको मंगलवार राति निधन भएको हो ।
लामो समयदेखि अस्वस्थ उनको स्वास्थ्य झन् बिग्रिएपछि मंगलवार साँझ दिल्लीको एम्स अस्पतालमा भर्ना गरिएको थियो । ६७ वर्षको उमेरमा उनको देहान्त भएको भारतीय संचारमाध्यमहरुले बताएका छन ।
१४ फरवरी १९५२ मा भारतको हरियाणा राज्यमा रहेको अंबालामा जन्मेकी सुषमा २५ वर्षको उमेरमै उक्त राज्यकी मन्त्री बनेकी थिइन् । भारतकै कम उमेरमा मन्त्री बनेको इतिहास रच्न सफल उनी सन् १९९८ मा दिल्लीको मुख्य मन्त्री पनि बनेकी थिइन् । अटल बिहारी बाजपेयीदेखि नरेन्द्र मोदीको सरकारसम्म आइपुग्दा सुषमा ४ पटक केन्द्रिय मन्त्री बन्न सफल भईन् ।
भारतीय राजनीतिक पार्टीको पहिलो महिला प्रवक्ता र विपक्षी दलको पहिलो महिला नेत्रीको नाम लेखाउन सफल स्वराज इन्दिरा गान्धी पछि विदेश मन्त्रालय सम्हाल्ने दोस्री महिला थिइन् ।
सुषमा सामाजिक संजालमा लोकप्रिय थिइन् । ट्विटरमा उनका १.३१ करोड़ फलोअर्स रहेका छन् ।
सर्वोच्च अदालतका वकील स्वराज कौशलसंग विवाह गरेकी सुषमाको एक छोरी मात्र छिन । छोरी बांसुरी लण्डनमा रहेर वकालत काम गर्छिन् ।