भक्तपुर, २६ साउन भारतीय काँग्रेस पार्टीको अध्यक्षमा फेरि सोनिया गान्धी चयन भएकी छिन्। राहुल गान्धीले निर्वाचनपछि पदबाट राजीनामा दिएपछि सोनिया अध्यक्ष भएकी हुन् ।
शनिबार रातिसम्म चलेको पार्टी केन्द्रिय कार्यसमितिको बैठकले सोनियालाई अन्तरिम अध्यक्ष बनाउने निर्णय गरेको हो ।
यसअघि सोनिया र राहुलले नयाँ अध्यक्ष चयन गर्दा हुने मतदानमा आफूहरु सहभागि नहुने घोषणा गरेका थिए। सोनियाले १९९८ देखि २०१७ सम्म काँग्रेसको नेतृत्व गरेकी थिइन् । त्यसपछि राहुलको हातमा आएको नेतृत्व पुनः सोनियामा फर्किएको हो। तर सोनियाले नेतृत्व लिन अस्वीकार गरेकी थिइन्। सोनिया राहुल गान्धीको आमा र पूर्व प्रधानमन्त्री स्व. राजीव गान्धीकी पत्नी हुन् ।
काँग्रेसलाई जसैगरि पनि १५ तारिख अगाडी नयाँ अध्यक्ष घोषणा गर्नु पर्ने भएकाले पनि अहिलेलाई अन्तरिम अध्यक्षको रुपमा सोनियालाई राखिएको भारतीय सञ्चारमाध्यमहरुले जनाएका छन्। १५ अगस्टमा अध्यक्षका हैसियतले पार्टी कार्यालयमा झण्डोत्तलोन गर्ने चलन छ। शनिबार कार्यसमितिको दोस्रो बैठकमा राहुलले पुनः अध्यक्षको जिम्मेवारी लिन अस्वीकार गरका थिए।
त्यसपछि प्रियंका गान्धीलाई अध्यक्ष बनाउने प्रस्ताव गरेपनि यसमा सहमति जुट्न सकेन ।