भ्रष्टाचारको आरोपमा भारतका पूर्व अर्थमन्त्री पी चिदंबरमलाई पक्राउ गर्न प्रहरी उनको घरमा पुगेको छ । केन्द्रीय अनुसन्धान व्यूरो सीबीआई उनको निजी निवास पुगेको भएपनि उनलाई भेट्न सकेको छैन ।

भारतीय संचारमाध्यमहरुले जनाए अनुसार चिदंबरमले उच्च अदालतमा दायर गरेको अग्रीम जमानतको निवेदन खारेज भएकोले उनी जुनसुकै बेला पनि पक्राउ पर्नसक्ने भएका छन् ।

भारतीय संचारमाध्यम अमरउजालाका अनुसार चिदंबरमका वकिलले पक्राउ नगर्नको लागि ३ दिनको समय मागे पनि अदालतले दिन इन्कार गरेको थियो । न्यायमूर्ति सुनील गौड़ले चिदंबरमको अग्रिम जमानत याचिका खारेज गरिदिएका थिए । यस्तो मामलामा जमानत दिएपछि समाजमा गलत संदेश जाने जिकिर गर्दै उनले जमानत याचिका खारेज गरिदिएका हुन् ।

आरोप
अर्थ मन्त्री भएको बेला 2007 मा पी चिदंबरमको कार्यकालले आईएनएक्स मीडिया लाई विदेशबाट प्राप्त ३०५ करोड़ रुपया स्वीकार गर्न मन्जुरी दिई अनियमितता गरेको आरोप लगाइएको छ ।आईएनएक्स मीडिया समूहमा विदेशी निवेश प्रोत्साहन बोर्ड (एफआईपीबी)को अनुमति दिलाउन चिदंबरमले पदको दुरुपयोग गरेको र आफ्नो छोरा कार्ति मार्फत ३०० करोड़ बढी घूस लिएकोमा उनीमाथि छानवीन गर्न केन्द्रीय अनुसन्धान व्यूरोले अनुमति प्राप्त गरेको छ ।