News Portal

  • को हुन् भक्तपुरमा नेकपाका उम्मेदवार ढकाल

    बाबुराम दाहाल / भक्तपुर पोस्ट भक्तपुर, १७ कात्तिक
    १०५३४ पटक
    भक्तपुर, १७ कात्तिक

    नेपाल कम्युनिष्ट पार्टी (नेकपा) ले मङ्सिर १४ मा निर्धारित उपनिर्वाचनका लागि भक्तपुरमा पार्टीका जिल्ला सचिव डीपी ढकाललाई उम्मेदवार चयन गरेको छ । नेकपाको सचिवालय बैठकले भक्तपुरको निर्वाचन क्षेत्र नम्बर १ अन्तर्गत प्रदेश क्षेत्र नम्बर १ मा हुने प्रदेश सभा सदस्यको उम्मेदवारमा ढकाललाई चयन गरेको हो ।

    आइतवार प्रधानमन्त्री निवास बालुवाटारमा बसेको सचिवालय बैठकले भक्तपुरको प्रदेश सभा सदस्य पदका लागि ढकाललाई उम्मेदवारमा सर्वसम्मत चयन गरेको नेकपाका प्रवक्ता नारायणकाजी श्रेष्ठ ‘प्रकाश’ ले बताए । भक्तपुर जिल्ला कमिटीले प्रस्ताव गरेको ३ नाममा एक महिला थपेर प्रदेश ३ को पार्टी पदाधिकारी बैठकले शुक्रवार ४ जनाको नाम सिफारिस गरेर केन्द्रमा पठाएको थियो । प्रस्तावित नाम मध्ये ढकाल सिनियर भएको र राजनीतिक रुपमा परिपक्वसमेत भएको ठहर गर्दै सचिवालय बैठकले ढकाललाई उम्मेदवार बनाउने निर्णय गरेको प्रवक्ता प्रकाशको भनाइ छ ।

    को हुन् नेकपाका उम्मेदवार ढकाल

    नेकपाले उम्मेदवार बनाउने घोषणा गरेका नेता ढकाल पूर्व माओवादी पृष्ठभूमीका हुन् । सोही निर्वाचन क्षेत्रको प्रदेश सभा सदस्यमा यस अघिको निर्वाचनमा समेत उनी नेकपा (माओबादी केन्द्र) का तर्फबाट उम्मेदवार रहेका थिए । तर, उनले उम्मेद्वारी दर्ता गराएपछि तत्कालिन नेकपा (एमाले)का पार्टी सचिव हरिशरण लामिछानेले पनि उम्मेद्वारी दर्ता गराउँदा माओवादी केन्द्रको निर्देशनमा ढकाल पछि हटेका थिए । उक्त निर्वाचनमा दुई पार्टीले चुनावी गठबन्धन गरेकाले गठबन्धन जोगाइराख्न ढकालले लामिछानेलाई मैदान छोडिदिएका थिए । नेकपा (माओवादी केन्द्र) का तर्फबाट दोश्रो संबिधान सभामा संबिधान सभा सदस्यको लागि निर्वाचनमा भाग लिएको अनुभव समेत उनीसंग छ । बुलेटको राजनीति गरेर आएको भएपनि नेता ढकालसँग ब्यालटको राजनीतिक अनुभव समेत पर्याप्त भएको भन्न सकिन्छ ।

    २०३८ सालमा काभ्रेको देउपुरमा जन्मिएका नेता ढकाल नयाँ पुस्ताका उदीयमान नेता हुन् । उनी भक्तपुरमा क्याम्पस पढ्दापढ्दै अखिल क्रान्तिकारीको होनहार नेता भैसकेका थिए । त्यतिमात्र होइन,२० वर्षे अल्लारे उमेरमा नै उनीभित्र भएको राजनीतिक चेतनाबाट आत्तिएको तत्कालिन सरकारले उनलाई २०५८ सालमा पक्राउ गरी चरम यातना दिएर १ वर्ष जेल हालिदियो । वर्गीय मुक्तिको सपना बोकेका नेता ढकाल जेल जीवनबाट थाकेनन् बरु अझ स्पातिलो बनेर बाहिर निस्के । त्यसपछि उनी अझ क्रान्तिकारी बन्दै जनताको मुक्तिको लागि भन्दै थालिएको भीषण जनयुद्धमा जनमुक्ति सेनाको हैसियतले सामेल हुनपुगे । घाटीमा गोलीको माला गाँसी राइफल भिरेर हिड्ने ढकाल दोस्रो पटक २०६१ सालमा पुन: पक्राउ परे । तत्कालिन शाही सेनाको चरम यातनाको जिउँदो गवाह ढकाल त्यतिबेला करिव ३ वर्ष जेल बस्न बाध्य बनेका थिए ।

    पार्टी शान्तिपूर्ण राजनीतिमा आएसंगै नेता ढकालको ब्याटल ब्यालटमा बदलियो । उनले पार्टीको बिभिन्न जिम्मेवारीमा रहेर काम गरे । नेता वर्षमान पुन अर्थमन्त्री हुँदा उनका प्रमुख स्वकीय सचिव रहेर काम गरेका ढकालले त्यसलाइ देशको अर्थ-राजनीतिमा राम्रो दख्खल राख्ने अवसरको रुपमा सदुपयोग गरे । तत्कालिन नेकपा (माओबादी केन्द्र) र नेकपा (एमाले) बीचको पार्टी एकता संगै बनेको नेपाल कम्युनिष्ट पार्टी(नेकपा ) का उनी अहिले भक्तपुर जिल्ला कमिटीका सचिव र प्रदेश नम्बर ३ का सदस्य रहेका छन् ।

    नेकपा भित्रका बौद्धिक युवा नेताका रुपमा डीपी ढकालले सानै उमेरमा ठूलो छाप बनाएका छन् । हालसम्म उनले नेपाली क्रान्ति, कम्युनिष्ट आन्दोलनको बहस लगायत आधा दर्जन पुस्तक लेखिसकेका छन् भने केहि महिना अघि मात्र प्रकाशित उनको कृती ‘पूजीवादी र समाजबादी अर्थराजनीतिक विकासक्रम’ राजनितिक वृत्तका अलावा प्राज्ञिक वृत्तमा पनि बहुचर्चित बनेको छ ।

    हाल भक्तपुर नगरपालिका वडा नम्बर १० का स्थायी बासिन्दा ढकाल आफू उम्मेदवार रहेको क्षेत्रका बासिन्दा समेत हुन् । उक्त क्षेत्रमा भक्तपुर-१० का साथै चाँगुनारायण नगरपालिकाका सबै वडा पर्दछन् । पार्टीका तर्फबाट उक्त क्षेत्रमा यस अघि निर्वाचित दिवंगत नेता हरिशरण लामिछानेको बिरासत बचाइराख्ने र उक्त क्षेत्रमा नेकपाको बिजय कायम राख्ने जिम्मेवारी पार्टीले यतिबेला ढकालको काँधमा सुम्पिदिएको छ ।

    याे पनि पढ्नुस्

    भक्तपुरको उपनिर्वाचनका लागि ४ जनाको नाम सिफारिस : शनिवार केन्द्रले निर्णय गर्ने सम्भावना

    प्रतिकृया दिनुहोस्

    सुवर्णेश्वर मन्दिर परिसरमा १ सय ८ शिवलिङ्ग र सप्तऋषि स्थापना

    भक्तपुरको सूर्यविनायक-५ कटुञ्जेस्थित सुवर्णेश्वर मन्दिर परिसरमा १ सय ८ शिवलिङ्ग र सप्तऋषिको स्थापना गरिएको छ...

    स्वयंसेविकालाई नियमित तालिम दिन सिडिओ शर्माको निर्देशन

    भक्तपुरकी सिडिओ रुद्रादेवी शर्माले महिला स्वयंसेविकालाई नियमित तालिम र परामर्श दिन भक्तपुर स्वास्थ्य कार्यालय र...

    निःशुल्क सेवा र औषधी प्रदान गर्दै भक्तपुर आयुर्वेद स्वास्थ्य केन्द्र

    जिल्ला आयुर्वेद स्वास्थ्य केन्द्र भक्तपुरले मंगलबार जिल्ला समन्वय समितिको हलमा स्थानीय पत्रकारहरुसँग अन्तरक्रिया कार्यक्रम सम्पन्न...

    छोटो समयमा धेरै उपलब्धि हासिल गर्नु नै वास्तविक उपलब्धि: सांसद गोसाई

    बाग्मती प्रदेशका नवनिर्वाचित सांसद सुरेन्द्रराज गोसाईले छोटो समयमा धेरै उपलब्धि हासिल गर्न सक्नु मात्र वास्तविक...

    नेपाल राष्ट्रिय कर्मचारी महासंघले स्थापना दिवसको अवसरमा शुक्रवार रक्तदान गर्ने

    नेपाल राष्ट्रिय कर्मचारी महासंघले आफ्नो स्थापना दिवसको अवसरमा रक्तदान गर्ने भएको छ । स्थापना दिवसको...