इरान र अफगानिस्तानबाट न्यूनचापीय पश्चिमी वायु प्रणाली नेपाल पसेको छ। उक्त प्रणालीले हिउँदयाममा पानी र हिउँ पार्ने गर्छ ।

यो प्रणाली प्रवेश गरेसँगै देशभरको तापक्रममा गिरावट आएको छ। बुधबार साँझदेखि पश्चिमी वायु नेपाल प्रवेश गरेको जल तथा मौसम विज्ञान विभागले जनाएको छ ।

यसले गर्दा नेपालको पश्चिमी उच्च पहाडी र हिमाली भू-भागमा भारी हिमपात हुने सम्भावना रहेको विशेष मौसम बुलेटिनमा उल्लेख छ। सो बुलेटिन विभागले जारी गरेको हो ।

जल तथा मौसम विभाग अनुसार आज देशका मध्य, पूर्वका उच्च पहाडी र हिमाली भू–भागमा हिमपात हुने सम्भावना रहेको छ। साथै, पछिल्लो पटक भित्रिएको मौसमी प्रणालीका कारण देशभरकै मौसम बदली भई अधिकतम र न्यूनतम तापक्रम समेत घट्नेछ।

उच्च पहाडी र हिमाली भू-भागमा भारी हिमपात र पहाडी भेगमा वर्षा भई तापक्रम घट्ने भएकाले सतर्कता अपनाउन विभागले अनुरोध गरेको छ। बुधबारबाट शुरू भएको यो मौसमी प्रणाली शनिबारसम्ममा अन्त्य हुनेछ।