भक्तपुर, ८ पुस सोमबार प्रहरीले चलाइएको स्विप अपरेसनमा मनमैजु, महाराजगञ्ज र बूढानीलकण्ठबाट १२२ जना पक्राउ परेका छन् । पक्राउमा पर्नेमा चिनियाँ नागरिक रहेका छन् ।
गृहमन्त्री रामबहादुर थापा ‘बादल’को चीन भ्रमणमा जाँदै छन् । उनको भ्रमणको पूर्वसन्ध्यामा नेपाल प्रहरीले विदेशी नागरिकविरुद्ध चलाएको हालसम्मकै ठूलो अपरेसन हो ‘स्विप अपरेसन’ ।
नेपालमा बसेका चिनियाँ नागरिकविरुद्ध प्रहरीले चिनियाँ सुरक्षा अधिकारी र नेपालस्थित चिनियाँ दूतावासको सूचनाको आधारमा ‘स्विप अपरेसन’ चलाएको हो ।
स्विप अपरेसनमा समातिएका चिनियाँ नागरिकले अंग्रेजी भाषा नबोलेका कारण बयान लिन कठिनाइ भएको प्रहरीले जनाएको छ ।
अनुसन्धान अधिकृतले भाषा अनुवादक बोलाएर सोधपुछ गर्ने काम भइरहेको बताएका छन् । ‘उनीहरुले नेपाललाई हानि पुर्याउने गरी काम गरेको देखिँदैन’, उनले भने, ‘तर, चीनतर्फ भने अपराध गरिरहेको देखिएको छ ।’
ती अधिकारीले भने, ‘यो दुई देशबीच भएको ठूलो सुरक्षा समन्वय हो । नेपालमा अपराध गरेर चीनमा लुक्नेलाई ल्याउन पनि यसले सहयोग गर्नेछ ।’
गृह मन्त्रालयका एक उच्च अधिकारीका अनुसार बादलको चीन भ्रमणसम्बन्धी प्रस्ताव सोमबार बसेको मन्त्रिपरिषद् बैठकमा पेस गरिएको थियो ।