भक्तपुर, ८ चैत विश्वकै सुरक्षितस्थल मानिने अमेरिकी राष्ट्रपति कार्यालय ‘ह्वाइट हाउस’ भित्र कोरोना भाइरस प्रवेश गरेको छ । ह्वाइट हाउसका एक उच्च अधिकारीलाई कोरोनाभाइरस पोजेटिभ पाइएको हो ।
अन्तराष्ट्रिय समाचारहरुले जनाए अनुसार उप राष्ट्रपति माइक पेन्सको सचिवालयका एक कर्मचारीमा कोरोना पोजेटिभ देखिएको छ । यसको खुलासापछि अमेरिकामा हल्लीखल्ली मच्चिएको छ ।
उप राष्ट्रपतिका प्रेस सचिव केटी मिलरले उपराष्ट्रपतिका एक कर्मचारीमा कोरोना पोजेटिभ पाइएको पुष्टि गरेपनि नाम भने सार्वजनिक नगरेको संचारमाध्यमहरुले जनाएका छन् ।
संक्रमित ति कर्मचारी कस कसको सम्पर्कमा आएका थिए भन्ने बारेमा पत्ता लगाउने प्रयास भइरहेको बताइएको छ । राष्ट्रपति कार्यालयमा डाक्टर र सेक्रेट सर्भिसका एजेन्टले स्वास्थ्य जांच लाई कडाइ गरिरहेका बताइएको छ ।
अमेरिकामा कोरोना भाइरस (कोभिड१९) का कारण हालसम्म २ सय ३० व्यक्तिको ज्यान गइसकेको छ भने संक्रमित हुनेको संख्या १८ हजार पुगेको छ । यहाँ पछिल्लो २ दिनमा १० हजार मानिसमा कोरोना भाइरसको संक्रमण पुष्टि भएको छ ।