स्पेनका पूर्व राजा ख्वान कार्लोस अगस्ट ३ तारिखदेखि संयुक्त अरब एमिरेट्स (यूएई ) मा बसिरहेको स्पेनको राजदरबारले पुष्टि गरेको छ । देश छाडेर हिँडेका उनी कहाँ छन् भन्नेबारे विभिन्न अड्कलबाजी चलिरहेको थियो ।
भ्रष्टाचारसमन्बन्धी एउटा अनुसन्धानकाबीच कार्लोसले अगस्ट ३ तारिखमा देश छाड्न लागेको अप्रत्याशित घोषणा गरेका थिए । राजदरबारका एकजना प्रवक्ताले ८२ वर्षीय पूर्वराजा अगस्ट ३ तारिखमा यूएई गएको र उनी त्यहीँ रहेको जानकारी दिए ।
अस्वीकार
एउटा ठूलो भ्रष्टाचारसम्बन्धी अनुसन्धानमा उनी जोडिएका छन् । र, उनको सम्पत्तिमाथि अध्ययन भइरहेको छ ।
उनले भने आफूले कुनै पनि गलत काम नगरेको बताउँदै आएका छन् ।
यो महिनाको सुरुमा उनेले आफ्ना छोरा फेलीपे षष्टमलाई पत्र लेखेर देश छाड्ने घोषणा गरेका थिए । ६ वर्षअघि उनले फेलीपेलाई गद्दी हस्तान्तरण गरेका थिए । सुरुमा उनले डोमेनिक रिपब्लिक जाने खबर आएको थियो तर स्पेनीश सञ्चार माध्यमहरूले पछि उनी यूएईको राजधानी आबुधावीमा अवतरण गरेको उल्लेख गरेका थिए । अहिलेसम्म सरकार वा राजदरबार कसैले पनि उनी कहाँ छन् भन्ने प्रस्ट पारेको थिएन ।
देश किन छाडे ?
ख्वान कार्लोसले सन् २०१४ मा करिब ४० वर्ष देखिको लामो सिंहासन त्याग गर्दै छोरा फेलीपेलाई शक्ति हस्तान्तरण गरेका थिए । स्पेनको सर्वोच्च अदालतले गत जुन महिनामा साउदी अरेबियामा एउटा हाइपीड रेलको ठेक्काका विषयमा कार्लोसको कथित संलग्नताबारे अनुसन्धान अघि बढाएको थियो ।
उनले सन् २००८ मा विदेशी खातामार्फत् साउदी अरबबाट १० करोड डलर प्राप्त गरेको समाचार सार्वजनिक भएको थियो । अनुसन्धानकर्ताहरूलाई आवश्यक परेमा आफू सोधपुछको निम्ति उपलब्ध हुने कार्लोसले बताएका छन् । दक्षिणपन्थी तानाशाह फ्रान्सिस्को फ्रान्कोको सन् १९७५ मा निधन भएपछि ख्वान कार्लोसले गद्दी आरोहण गरेका थिए।
स्पेनलाई अधिनायकवादबाट प्रजातन्त्रसम्म डोर्याउने श्रेय कार्लोसलाई दिइन्छ । त्यसैले संवाददाताहरू भन्छन्, यो उनको अपमानजनक बहिर्गमन हो । बीबीसी