एजेन्सी । ब्राजिलमा कोरोना भाइरसबाट मृत्यु हुनेको संख्या १ लाख ५० हजार नाघेको छ ।
कोरोना भाइरसबाट धेरै मृत्यु हुने देशमध्ये दोस्रो नम्बरमा रहेको ब्राजिलमा संक्रमणबाट १ लाख ५० हजार भन्दा बढीको व्यक्तिको मृत्यु भएको त्यहाँको स्वास्थ्य मन्त्रालयले पुष्टि गरेको छ ।
कोरोना संक्रमणबाट अमेरिकामा २ लाख १९ हजार मानिसको मृत्यु भइसकेको छ भने भारतमा १ लाख ८ हजारको मृत्यु भएको छ । ब्राजिलमा कोरोना संक्रमितको संख्या ५० लाख ९१ हजार छ । जसमध्ये ४४ लाख मानिस कोरोनामुक्त भइसकेका छन् । ब्राजिलमा राष्ट्रपति जैर बोलसोनारोमाथि कोरोना भाइरसको संक्रमणबाट जोगिनका लागि विश्व स्वास्थ्य संगठनले तय गरेका मापदण्डहरु पालना गराउन चासो नदेखाएको आरोप छ ।
दक्षिण अमेरिकामा सबैभन्दा बढी प्रभावित देश ब्राजिलको साउ पाउलो सहर कोरोनाको केन्द्रविन्दु बनेको छ । ब्राजिलको स्वास्थ्य मन्त्रालयका अनुसार मार्च महिनामा पहिलो पटक कोरोना संक्रमितको मृत्यु भएको थियो । दक्षिण अमेरिकी देशमा धेरै प्रभावित मध्येको अर्काे देश कोलम्बियामा संक्रमणबाट २७ हजार ४९५ जनाको मृत्यु भएको छ । त्यहाँ ८ लाख ९४ हजार मानिस संक्रमित भएका छन् ।
