भक्तपुर, ११ जेठ २०७८आन्तरिक राजस्व कार्यालय भक्तपुरले नियमित सेवा प्रवाहलाई रोकेको छैन । कोभिड १९ कहरका बीच पनि कार्यालयले आफ्नो नियमित सेवा प्रवाह गरिरहेको छ ।
कोभिड संक्रमणका कारण कतिपय सरकारी कार्यालयहरुमा कर्मचारी अभाव भएका र सेवा प्रवाह प्रभावित भएको गुनासो आइरहँदा आन्तरिक राजस्व कार्यालय भक्तपुरले आफ्ना सबै सेवाहरु सुचारु रहेको जनाएको छ । निषेधाज्ञाको समयमा अनलाइनबाट सेवा प्रवाहलाई प्राथमिकता दिएता पनि भौतिक रुपमा उपस्थित भएर सेवा लिन आउनेहरुलाई पनि आफूहरुले नफर्काएको कार्यालय प्रमुख गगनबहादुर बिकेले बताएका छन् ।
कार्यालय प्रमुख बिकेले जनाए अनुसार कार्यालय दुई सिफ्टमा संचालन भैरहेको छ र त्यसका लागि सिफ्ट वाइज कर्मचारीहरु व्यवस्थापन गरिएको छ । आवश्यक जनशक्ति लाई मात्र काममा लगाइएको उनले बताए । कार्यालय संचालनमा रहेपनि निषेधाज्ञा अघिको जस्तो सेवाग्राहीको चाप भने छैन । बैंकबाट कर तिर्ने र अन्य सेवाका लागि अनलाइन बाट हुने व्यवस्था गरिएकाले सेवाग्राहीलाई सहजै भएको उनको भनाइ छ ।
व्यक्तिगत स्थायी लेखा नम्बर (पान नम्बर) लिन र करचुक्ताको प्रमाणपत्र लिन दैनिक केहि सेवाग्राही आउने गरेका कार्यालय प्रमुख बिकेले बताएका छन् । दैनिक औषतमा १० जनाले कार्यालयमा भौतिकरुपले उपस्थित भएर सेवा लिइरहेका उनको भनाइ छ । कार्यालय प्रमुख बिकेले अत्यावश्यक नभई र कोभिड संक्रमण वा संक्रमित संग सम्पर्कमा रहेका व्यक्तिलाई सेवाका लागि नआउँन समेत अनुरोध गरेका छन् ।
यो पनि
भक्तपुरबाट २ महिनामा ११ हजार बढीले लिए व्यक्तिगत पान : यसरी प्राप्त गर्न सकिन्छ पान नम्बर
