भक्तपुर, २० चैत २०७८प्रगतिशील साहित्यको क्षेत्रमा आफ्नो बेग्लै परिचय बनाइसकेका युवा कथाकार रोहित दहालको छैठौं कृती प्रकाशित भएको छ । भक्तपुरको दुवाकोट निवासी प्रगतिशील कथाकार दहालको नयाँ पुस्तक ‘धरातलबाट उठेर हेर्दा’ कथा संग्रह प्रकाशित भएको हो ।
कथा संग्रह ‘धरातलबाट उठेर हेर्दा’मा ९ वटा प्रगतिशील कथाहरु संग्रहित छन् । सरल भाषामा जनताको ब्यथा बोल्ने यी कथाहरुले समाजको यथार्थ तस्विर पेश गरेकाले कथामा कल्पना कम र बास्तविकता बढी भएको प्रकाशकको भनाइ छ । कथा संग्रहलाई सिकाइ मासिकले प्रकाशन गरेको हो । उक्त कथा संग्रह १३४ पेजको रहेको छ भने बजार मूल्य २ सय ५० रुपियाँ रहेको सिकाइ मासिकका निर्देशक रमेश दाहालले जानकारी दिए ।
कथाकार दहालले यस अघि इस्पातले बनेका मान्छेहरु, पैतालाले थिचेको देवता, विष्णुका अवतार-मार्क्सबादी विश्लेषण लगायत पुस्तक प्रकाशन गरिसकेका छन् । ग्रामिण विकाश र अर्थशास्त्रमा स्नातकोत्तर गरेका दुवाकोट निवासी लेखक दहाल सानोठिमीस्थित सिटिइभिटिका उपनिर्देशक समेत हुन् ।