भक्तपुर, ३ साउन २०७९नेपाली सुगम आधुनिक संगीतका एक अजर अमर गायक तथा संगीतकार अरुण थापाको ‘२३ औं स्मृति दिवस २०७९’को अवसरमा भक्तपुरमा ‘अरुण थापा स्मृति साँझ’ हुने भएको छ । भक्तपुर साँगीतिक समाजको आयोजनामा कार्यक्रम यही साउन ७ गते शनिवार हुँदैछ । समाजले थापाको स्मृतिका लगातार पाँचौं पटक स्मृति साँझ आयोजना गर्न लागेको हो ।
कार्यक्रममा भक्तपुरका स्थानीय कलाकारहरुले स्व. थापाका गित गुनगुनाउने छन् । कार्यक्रममा सत्यनारायण मानन्धर, लक्ष्मण पलिखेल, राजेश शाही, रोशन धौभडेल, विनोद राज ढुंगेल, अधीश्री कसपाल र नविन्द्रलाल कर्माचार्यले स्व. थापाका गित गाउने आयोजक समाजका अध्यक्ष प्रविण शाहीले बताएका छन् । त्यसैगरी वाद्यवादनमा गायकहरुलाई कृष्णसुन्दर सुजखु, महेन्द्र सिंख्वाल, सरोज केसी, श्रीजल मधिकर्मी, अनिश शाक्य र यजु आर्चाले वाद्यवादनमा साथ दिने अध्यक्ष शाहीले जानकारी गराए ।
कार्यक्रमलाई सिद्धि स्मृति प्रतिष्ठान, अक्सफोर्ड प्राक्टिकल ईङ्गलिस स्कुल, गुडविल कन्सल्टको सहयोग रहेको छ भने कार्यक्रमको रेडियो पार्टनर भक्तपुर एफ एम १०५ दशमलव ४ मेघाहर्ज, टेलिभिजन पार्टनर भादगाउँ टेलिभिजन, मिडिया पार्टनर न्यूज अफ साप्ताहिक, फोटोग्राफी पार्टनर पिक्सेल्स इन्ग्राभर्स र साउण्ड पार्टनर आराधना संगीत समूह रहेका बताइएको छ ।
वरिष्ठ संगीतकार दिपक जंगमको प्रमुख आतिथ्यतामा आयोजना हुने कार्यक्रममा वरिष्ठ गितकार दिनेश अधिकारीलाई ‘अरुण थापा स्मृति सम्मान २०७९’ले सम्मान गरिने समाजका उपाध्यक्ष कपिल कस्पालले जानकारी दिएका छन् ।
कार्यक्रमको तयारी अन्तिम चरणमा पुगेको आयोजकको भनाइ छ । कोरोना महामारीका कारण विगत दुई वर्ष कार्यक्रमलाई औपचारिकतामा सिमित गरिएको थियो । यसवर्ष बृहतरुपमा गर्ने निर्णय अनुसार काम अघि बढेको बताइएको छ । कार्यक्रम अक्सफोर्ड प्राक्टिकल ईङ्गलिस स्कुल सल्लाघारीको प्रांगणमा हुने भक्तपुर साङ्गितिक समाजका सचिव अल्ब्रट बज्राचार्यले बताएका छन् ।