भक्तपुर, ११ असार २०८०नेपाल कृषिप्रधान देश हो । नेपालमा धानलाई मुख्य बालीको रूपमा परम्परादेखि नै मानिँदै आइएको छ । मानो रोपेर मुरी फलाउने बालीमा धानलाई लिइन्छ । मानो रोप्ने महिना असार हो भने मुरी भित्र्याउने महिना मंसिर हो ।
असारको १५ लाई धानदिवसको रूपमा मनाइन्छ । यही असार १५ को सेरोफेरो पारेर स्रष्टाहरूले धान रोपाईं गरेका छन् । उक्त धान रोपाईं कार्यक्रमको अयोजना साहित्य, संस्कृति र महिला सशक्तीकरणको लागि काम गर्दै आएको सखी प्रतिष्ठानले गरेको हो ।
प्रत्येक बर्ष स्रष्टाहरुको लागि धान रोपाईंको कार्यक्रमको आयोजना गर्दै आएको सखी प्रतिष्ठानले यो वर्ष पनि आयोजना गरेको हो ।
प्रतिष्ठानको आयोजनामा फसिकोटस्थित १२ रोपनी जग्गामा स्रष्टाहरूद्वारा धान रोपाईं गरिएको हो ।
धान रोपाईंको अवसरमा स्रष्टाहरूले हात्ती गौडा, फसिकोट, काठमाडौंमा कृषियोग्य जमिनलाई प्लटिङ नगर्न र काठमाडौं उपत्यकालाई कङ्क्रिटको जङ्गल नबनाउन अनुरोध गरेका छन् ।
सखी प्रतिष्ठानकी अध्यक्ष मन्जिला अनिलको संयोजनमा आयोजना गरिएको आज सम्पन्न धान रोपाईंमा सखी प्रतिष्ठानका प्रमुख सल्लाहकार एवं साहित्यिक पत्रकार संघका अध्यक्ष राधेश्याम लेकाली, साहित्यिक पत्रकार संघका पूर्व अध्यक्ष नरेन्द्रबहादुर श्रेष्ठ, घुम्ती मुक्तक नेपालका अध्यक्ष निर्मलरमण पराजुली, समाजसेवी सिर्जना रानी बस्नेत बर्मा, साहित्यकारहरु भगवती बस्नेत, जितेन्द्र रसिक, कमला रिसाल, सरिता सापकोटा, निशा रिमाल, स्मृति डङ्गोललगायत स्थानीयहरुको समेत सहभागीता रहेको थियो ।