पाकिस्तानको रक्षा तथा शहीद दिवसको अवसरमा काठमाडौंमा एक स्वागत समारोह सम्पन्न गरिएको छ । शुक्रबार साँझ सो कार्यक्रम सम्पन्न भएको हो ।

कार्यक्रमका प्रमुख अतिथि नेपाली सेनाका कार्यवाहक प्रधानसेनापति लेफ्टिनेन्ट जनरल अशोक राज सिग्देलले पाकिस्तान र नेपालबीचको बहुआयामिक द्विपक्षीय सम्बन्ध, जसमा आर्थिक, व्यावसायिक, शैक्षिक, प्राविधिक सहयोग तथा सैन्य सम्बन्धहरू रहेकाबारे बताएका छन् । उनले संकटको समयमा पाकिस्तानले प्रदान गरेको सहयोगलाई उच्च प्रशंसा गर्दै मित्र रास्ट्रको रुपमा नेपाली संस्थाहरूको क्षमता बिकासमा पाकिस्तानले निस्वार्थ सहयोग गरिरहेको उल्लेख गरे । दुई देशबीचको आपसी सहयोग मैत्रीपूर्ण सम्बन्ध आगामी दिनमा पनि कायम रहने उनले बिश्वास व्यक्त गरेका छन् ।

सो अवसरमा नेपालका लागि पाकिस्तानी राजदूत अबरार एच हाश्मीले रक्षा तथा शहीद दिवसको महत्त्वमाथि प्रकाश पार्दै मातृभूमिको रक्षाका लागि जीवन उत्सर्ग गर्ने पाकिस्तानका सशस्त्र बल, कानून प्रवर्तन निकायहरू र नागरिकहरूको बलिदानप्रति उच्च प्रशंसा र सम्मान प्रकट गरे ।

राजदूत हाश्मीले पाकिस्तानले क्षेत्रीय शान्ति र स्थायित्वमा आफ्नो दृढ प्रतिबद्धता कायम राखेको र आतंकवादविरुद्धको वैश्विक संघर्ष तथा संयुक्त राष्ट्र संघको शान्ति मिसनमा महत्त्वपूर्ण भूमिका खेलेको बताए ।

पाकिस्तानले आफ्नो सार्वभौमसत्ता, सुरक्षा र भौगोलिक अखण्डताको प्रश्नमा कहिल्यै सम्झौता नगर्ने प्रष्ट पार्दै उनले शहीदहरूको बलिदानीलाई पथप्रदर्शनको रुपमा लिएर अघि बढिरहेको बताए ।

रक्षा सहचारी कर्णेल मोहम्मद अली अलवीले आफ्नो मन्तव्यमा पाकिस्तानको रक्षा तथा शहीद दिवसको महत्त्व र पाकिस्तानका सशस्त्र बल तथा कानून प्रवर्तन निकायहरूले राष्ट्रिय तथा अन्तर्राष्ट्रिय शान्तिका लागि पुर्‍याएको योगदानबारे चर्चा गरेका थिए । साथै, उनले दुई देशबीचको बलियो सैन्य सम्बन्धलाई क्षेत्रीय शान्ति र स्थायित्व प्राप्त गर्ने साझा दृष्टिकोणले मार्गदर्शन गरेको बताए ।

कार्यक्रमको क्रममा पाकिस्तानका सशस्त्र बल, रक्षा उत्पादन र पाकिस्तानको संस्कृति सम्बन्धी वृत्तचित्रहरू पनि प्रदर्शन गरिएको थियो ।

उक्त समारोहमा वरिष्ठ नेपाली सैन्य तथा नागरिक अधिकारीहरू, राजदूतहरू, सेवानिवृत्त वरिष्ठ सेना अधिकारीहरू, पूर्व प्रधानसेनापति, शैक्षिक क्षेत्रका व्यक्तित्वहरू, कूटनीतिक निकायका सदस्यहरू, रक्षा सहचारीहरू, संयुक्त राष्ट्र संघका प्रतिनिधिहरू, सञ्चारकर्मीहरू र पाकिस्तानी समुदायका सदस्यहरूको उपस्थिति रहेको थियो।