भक्तपुर, ११ कात्तिक २०७८नेकपा(एमाले) को सूर्यविनायक नगर कमिटीमा युवा नेता सुरज थापा सबैभन्दा कान्छो सदस्य भएका छन् । २८ वर्षीय थापा सूर्यविनायक नगर कमिटीमा सर्वसम्मत निर्वाचित भएका हुन् ।
७५ सदस्यीय नगर कमिटीमा सुरज उमेरका आधारमा सबैभन्दा कान्छो सदस्य भएका नेकपा (एमाले) भक्तपुरका युवा नेता अशोकराज ढुंगेलले पुष्टि गरे । सक्षम युवाहरुलाई नेतृत्वमा ल्याउने पार्टी नीति बमोजिम सुरजलाई सर्वसम्मत निर्वाचित गरिएको उनले बताए ।
व्यवस्थापनमा स्नातक सुरज सूर्यविनायक नगरपालिका वडा नम्बर ५ कटुन्जेका स्थायी बासिन्दा हुन् । उनी समाजसेवामा सधै अगाडी रहने हुँदा पार्टी भित्र मात्र नभई स्थानीय समुदायमा पनि लोकप्रिय रहेका छन् । देश र समाजको बिकास गर्न नेतालाई गाली गरेर नहुने उनको मत रहेको छ । सक्षम युवाहरु राजनीतिमा आएर देश र जनताको सेवामा समर्पित हुनुपर्ने आवश्यकता औल्याउदै उनले राजनीतिलाई सेवाको अवसरका रुपमा आफूले सदुपयोग गर्ने प्रतिवद्धता प्रकट गरे ।
नेकपा (एमाले) को सूर्यविनायक नगर अध्यक्षमा भने रवीन्द्र सापकोटाले निरन्तरता पाएका छन् । नगर अधिवेशनबाट गुण्डुका नेता सापकोटाको नेतृत्वमा बुधवार ७५ सदस्यीय नगर कमिटी निर्विरोध निर्वाचित भएको हो ।
कमिटीको उपाध्यक्षमा बिनय महत, सचिवमा शिवराम राउत, उपसचिवमा श्याम श्रेष्ठ र कमला पोखरेल सर्वसम्मत निर्वाचित भएका नेता अशोकराज ढुंगेलले जानकारी दिएका छन् ।